Epeses 3 - Nupela Testamen long tokples Kandas

A pinapam anun o Pol torom det ra awu sur a taro Juda

¹ I mo ra iau o Pol, a wararing sur mot. Iau a karabus anun o Karisito Iesu, uni a papam torom mot ra awu sur a taro Juda.

² A nuki lena, mot sa longoro tari lena, o God i sa pitar tar a pinapam ri tang una nun a labino marmaris, sur an warut mot.

³ Ma o God i utalapor iau una utna ra numugu i kis eno. Ma una pas ri a sa tumtumus lilik pas uni.

⁴ Ra mot in luki, mot in tasman asau ra a sa talapor uni, una utna un o Karisito, ra numugu i kis eno.

⁵ A kum taun taro tagun numugu, kataio i inanos talapor det uni, ikut uniri a Tokodos na Nion i upuaso i torom a kum tasur na aposel anun o God, ma a kum tasur na poropet anun o God.

⁶ Iri a utna ra numugu i kis eno: Det ra awu sur a taro Juda, ra det in mur a Wakak na Wasiso, det in rarakon tomo nama taro Juda, una kum utna ra o God i udan a kum nutnutunu nami. Ma det rop, ara musano mukut. Ma det ra tagun o Karisito Iesu, a kum liliman anun o God anundet utkai.

⁷ A wanpat a tultul anun a Wakak na Wasiso ri. Una nun a marmaris ma a dekdekino, o God i pitar tar a pinapam ri tang.

⁸ Ma iau, a natino sakit tandet rop a taro anun o God. Ikut i maris iau, ra i pitar tar a pinapam ri tang, sur an warawai torom det ra awu sur a taro Juda una kum utna anun o Karisito ra i labo sakit, ma ken elar sur taio in tasman rop pasi.

⁹ O God, i ra i ukis a kum utna rop, i pitar tar a pinapam tang, sur an utalapor a taro rop una nuknukino ra numugu i kis eno.

¹⁰ Ikut uniri, i pami lenri torom a taro na lotu, sur in upuaso anun a labino mananos torom a kum nion, det ra det mugumugu ma det ra det utur ukai a warkurai una langit.

¹¹ Tagun narap utmakai o God i tasmani una nuknukino lena in pami lenra. Ra uniri, i sa pam sot pasi un o Karisito Iesu anundat a Labino.

¹² Dat langolango sur dat in nan torom o God ma ka dat in ngara, uni dat tagun o Karisito ma dat nurnur uni.

¹³ I mo ra, a saring mot sur gong mot tusako ra mot longoro a kum mamaut ra a barato i sur an warut mot. A taramo a mamaut sur anumot a kinkinis na minamar.

A marmaris anun o Karisito

¹⁴ I mo ra, a kis butkeke umatan a Tamandat nama niaring,

¹⁵ i ra a Taman a kum kabo taro sapat netes una langit ma nin upiso kai, ma i pitar tar a nilaun torom det rop.

¹⁶ Ma o God anun a ululeng i bukus nama minamar. Ra a wararing sur in tabor mot nama Niono, sur in udekdek a niomot,

¹⁷ sur o Karisito in kis una balamot, ra mot nurnur uni. Ra a wararing sur anumot a marmaris in tur dekdek elar namin nanai ra a wakakorino i rarau.

¹⁸ Ra a wararing sur mot tomo nama taro rop anun o God, mot in dekdek sur mot in tasman mulus a marmaris anun o Karisito, ra i perere pepetlai, i walos pepetlai, i tur toto pepetlai, ma i dordorong pepetlai.

¹⁹ A wararing sur mot in tasman a marmaris anun o Karisito, ra i labo taun a mananos anun a taro, sur mot in bukus nama kudulano nilaun anun o God.

²⁰ Dat in rakon lekeleke pas o God, o naro ra i dekdek, ma i pet lari sur in pam a utna ra i labo sakit taun a kum utna rop ra dat sasaring suri, ma dat nuki. Ma i papam nama dekdekino una nundat a nilaun.

²¹ Dat tomo nama taun taro rop numur, dat in rakon lekeleke pasi, ken rop ma ken rop, una kum lamlabino utna i sa pam tari una taro na lotu, ma un o Karisito Iesu. Amen.