Epeses 1 - Nupela Testamen long tokples Kandas

¹ Iau o Pol, a aposel anun o Karisito Iesu una nemnem anun o God. A tumus a pas ri torom mot a taro anun o God ra mot kis tiro o Epeses, mot a kum lingmulus na tene nurnur un o Karisito Iesu.

² A marmaris ma a malmal tan o God a Tamandat ma a Labino o Iesu Karisito in kis tomo nam mot.

Un o Karisito, o God i udan dat nama kum utna na nion

³ Dat in watung ulabo pas o God, a Taman anundat a Labino o Iesu Karisito. I udan dat nama kum utna na nion rop tagisapat una langit, ra dat tagun o Karisito.

⁴ Numugu utmakai ra o God ke ukisi utmakai a rakrakon bual, i sa pilok tar dat, sur dat anun a taro, ma katu etakun in los dat umatano, uni dat kis un o Karisito.

⁵ Una nun a marmaris, numugu utmakai i sa tasmani lena in ras pas dat sur dat a kum nutnutunu, una pinapam anun o Iesu Karisito ra i ulaun dat. Una nun a nemnem ut ma una nun a gasgas i pami lenri.

⁶ Ra dat in watung ulabo pas o God una nun a wakak na marmaris ra i tabor oros tar dat nami, una Nutunu ra i maris doko i.

⁷ O Karisito i mat, ra a gapino i kul langolango pas dat, ma o God i unus ru anundat a kum sakino petutna. A marmaris ra, anun o God i labo sakit,

⁸ ma i ser tabor liklik dat nami, tomo nama mananos rop ma a wakak na nuknuk.

⁹ O God i ese dat una kum utna ra numugu i kis eno, ma in pami un o Karisito. Una kum utna ra, i muri ut anun a nemnem, ma i gas nami.

¹⁰ Anun a nemnem i lenri: In dat tomo a kum utna rop sapat netes una langit ma nin upiso, sur det rop det in kis utuntudu ina warkurai anun o Karisito. Ra a bung in sot in pam sot pasi ut.

¹¹ A kum utna rop ra o God i ser pami, i pami elar ut nam anun a nemnem ma a nuknukino. Numugu utmakai i pilok pas met a taro Juda, sur met tagun o Karisito, elar ut nam anun a nemnem.

¹² I pilok pas met, a mugano taro ra met nurnur un o Karisito, sur met in watung ulabo pas o God kibino una nun a minamar.

¹³ Ma mot kai tagun o Karisito, uni mot longoro a lingmulus na wasiso ri, a Wakak na Wasiso lena o God in ulaun pas mot. Ra mot nurnur un o Karisito, o God i ubek tar anun a ukinalong un mot, a Tokodos na Nion, ra i sa uliliman mugu taru uni.

¹⁴ A Tokodos na Nion i a mugano etabor, sur in ulingmulus anun a liliman lena, numur una bung ra o God in ulangolango pas anun a taro, dat in rakon a kum utna ra o God i sa uliliman taru uni. I mo ra, dat in watung ulabo pas o God kibino una nun a minamar!

O Pol i wararing sur a taro na lotu

^15-16 I mo ra, a ser wararing sur mot. Ra a longoro i lena mot sa nurnur una Labino o Iesu, ma mot nem a taro rop anun o God, ka mana nama watung wakak torom o God un mot. Ma una nung a kum niaring a ser nuk pas mot.

¹⁷ A ser wararing lena a God anun anundat a Labino o Iesu Karisito, a Tamandat ra i bukus nama minamar, in tabor mot nama mananos tan a Tokodos na Nion, ma in papos a nuknuki mot, sur mot in tasman wakak o God.

¹⁸ A wararing lena in utalapor a matan a kum niomot, sur mot in tasman a utna ra dat kis langlang nama nurnur suri, ra o God i kabo pas dat sur dat in rakon pasi. A utna ra dat a taro anun o God, dat in rakon pasi, i labo sakit ma i bukus nama minamar.

¹⁹ Ma mot in tasmani lena a dekdekin o God ra i warut dat, a kum tene nurnur, i labo sakit. Ka din pet lar pasi sur din elaro i nam tu utna. A dekdekino ra, i elar nama dekdek ra o God i papam nami ra

²⁰ i ukatutur pas o Karisito gusun a minat, ma i ukis tari una papor sot na lamano sapat netes una langit.

²¹ Ra o Karisito i labo taun a kum ngas na nion rop lenri, a kum nion ra det mugumugu, ma a kum nion ra det utur ukai a warkurai, ma a kum nion ra det utur ukai a dekdek, ma a kum nion ra det kiskis na labino. A risan o Karisito i labo sakit taun a kum rising una nilaun ri, ma una nilaun numur kai.

²² O God i ubek tar a kum utna rop utuntudu ina dekdekin o Karisito, ma o God i ukis tar o Karisito sur in lorin a kum utna rop, sur a wakakino anun a taro na lotu.

²³ Ma a taro na lotu det a pinin o Karisito. Ma o Karisito i bukus un det, ma i ubukus a kum utna rop kai una wur ngas na kisapi rop.