Aposel 20 - Nupela Testamen long tokples Kandas

A inawan anun o Pol utong o Troas

¹ Ra i sa rop a purpuruon, o Pol i itula pas a taro na ususer, i udekdek tar det, ma i wasiso na itula taru tandet. Numur i wan utong una papor Masedonia.

² I wan papas una kum tamon ra, ma i uragot tar det nama susut na wakak na wasiso. Numur i wan utong o Grik.

³ I kis tiro iai a tulin kalang. Numur i waninar sur in kas una sip utong una papor Siria, ikut i tasmani lena a kum te Juda det wasiso tomo pas sur det in um doko i. Ra i pukus a nuknukino ma i nuki lena i wakak sur in nan melet epotor una papor Masedonia.

⁴ Ma o Sopata, a te Beria, a nutun o Pairas, ma o Aristakus ma o Sekundas, aru te Tesalonaika, ma o Gaius a te Derbe, ma o Tikikus ma o Tropimus, aru te Asia, ma o Timoti, det wan tomo nam o Pol.

⁵ Det ri det mugu utong, ra det kis langlang met tong o Troas.

⁶ Ra i sa rop a labino bung na lotu na beret ra kalako is uni, met kas una sip tagitong o Pilipai. A limo na bung bat tari, met sot tong o Troas torom det ra det mugu gusun met, ma met kis pas a wonom mawit na bung tiro iai.

O Pol i ulaun pas o Iutikus

⁷ Una mugano bung una wik, met kis tomo sur met in nangon tomo. Ra o Pol i wasiso torom a taro, ma i walos doko anun a wasiso, tuk ut una labino mirum, uni i nemi sur in nan kut gusun det una bung numur.

⁸ A susut na lam kura una kukur rumu sapat netes ra met kis tomo iai.

⁹ Ra ara barman, a risano o Iutikus, i kis taru una windo. O Pol i wasiso liklik, ra in matan o Iutikus i sunu doko, ma i inep dumun taru, ra i puku pirso tagisapat netes gusun a mantul na kukur rumu unago upiso. Ra det los pat tari, i sa mat.

¹⁰ Ra o Pol i pirso, i inep netes uni, ma i tal pasi, ma i watungi lena, “Gong mot ngara, i sa laun.”

¹¹ Numur o Pol i ka toto melet, i tibik pas a beret ra i wangon. Ma i wasiso tuk in matanas i pusu pat, ra numur i wan pas gusun det.

¹² Ra a taro det wan susuaro, det wan tomo nam o Iutikus, i sa laun, ra det gas doko.

O Pol i wan tagitong o Troas utong o Miletus

¹³ Met mugu, ra met kas una sip utong o Asos sur met in ukas pas o Pol tiro iai. I ut i sa watung len tari ra, uni i nemi sur in usur a kisapi kut.

¹⁴ Ra met etorom nami tong o Asos, met ukas pasi ra met wan utong o Mitilini.

¹⁵ Una bung numur met wan tagitong ra met wan milau ara ailan, a risano o Kios. I waspi kobot melet, ra met wan tiro upaporin o Samos, ra una bung numur melet tano, met sot tong o Miletus.

¹⁶ O Pol i sa pam tari una nuknukino sur in nan sakiti kut o Epeses, sur gong melet mo i balon tong una papor Asia, uni i nemi sur in nan lakit usapat o Jerusalem sur in kis sapat, una bung na Pentikos.

A ururop na wasiso anun o Pol torom a kum mugumugu anun a taro na lotu tong o Epeses

¹⁷ Met wanpat una tamon Miletus, ra o Pol i itula utong o Epeses sur a kum mugumugu anun a taro na lotu.

¹⁸ Ra det wanpat toromi, i watungi tandet lena, “Mot tasmani ut anung a ngas na kinkinis una kum bung ra a kis pas nisamot, turpasi una bung ra a wanpat kibin nin una papor Asia.

¹⁹ A taro Juda det wasiso tomo sur det in pam a kum sakino petutna un iau, ma a taramo a mamaut uni. Ikut, a papam ut torom a Labino, ma a unatino pas iau, ma a lurlur na matang i puku.

²⁰ Ra a ser warawai ma a ususer mot, umatan a taro ma una numot a kum rumu utkai, ka ngara ma ka munu tu utna ra in warut mot.

²¹ A warawai torom a taro rop, a taro Juda ma det ra awu sur a taro Juda kai, sur det in nukpukus torom o God ma det in nurnur una nundat a Labino o Iesu.

²² “Ra uniri, a Tokodos na Nion i ungongos iau sur an nan ut usapat o Jerusalem, ma ka tasman asau an etoromi sapat.

²³ A tasmani kut lenri, una kum tamon rop, a Tokodos na Nion i inanos iau lena a karabus ma a kum mamaut det kis pas iau.

²⁴ Ikut ka nuk labo pas anung a nilaun, ma ka maris bati. Awu! A pitar tar iau kut sur an pam sot rop tar anung a inawan ma a pinapam, ra a Labino o Iesu i pitar tari torom iau, sur an wasiso puaso una Wakak na Wasiso una marmaris anun o God.

²⁵ “A tasmani lena mot rop, ra a wan tuptupukus torom mot nama warawai una matanitu anun o God, ka mot in tama melet iau mo.

²⁶ I mo ra uniri, a inanos kapo tar mot lena, ra taio tagun mot in iru una warkurai anun o God, awu sur iau a kibino, iau, a sa langolango.

²⁷ Uni ka ngara ma ka munu tu utna una nuknukin o God. A sa watung rop tari torom mot.

²⁸ “Mot in tamtamabat wakak taru un mot, ma a kum sipsip kai, ra a Tokodos na Nion ut i sa pitar tari torom mot sur mot in tamtamabat det. Mot in tamtamabat a taro na lotu anun o God, ra i sa kul pas det nama gapino ut.

²⁹ A tasmani lena, ra an nan gusun mot, lako taro elar nama kum lomlom na pap ra det ngalngalia, det in ruk torom mot, ma det in ban laulau a kum sipsip.

³⁰ Ma lako taro utkai tagun mot det in tur pat, ma det in pukus a lingmulusino, sur a taro na ususer det in mur det.

³¹ Mot in tumarong! Mot in nuk pasi lena, a tulu kilalo ka mana gusun mot rop nama wasiso na utumarong, una kum mirum ma a waspi, ma a lurlur na matang i puku uni.

³² “Uniri a pitar tar mot ulaman o God, ma a pitar tar mot una nun a wasiso ra i upuaso anun a marmaris. A wasiso ra, i pet lar pasi sur in udekdek mot, ma in tabor mot nama kum wakak na etabor ra o God i ser tabor anun a taro nami.

³³ Ka nuknuk laulau sur tu mani anun taio, o tin namalu anun taio.

³⁴ Mot ut, mot tasmani lena, a papam ut nama aru lamang sur a kum utna ra in topas iau, ma det kai ra met wan tomo.

³⁵ Una kum dekdek na pinapam rop ra a ser pami, a sa ese tar mot lena mot kai mot in pami lenra, ma mot in warut det ra kalako dekdekin det. Ma mot in nuk pas a wasiso anun a Labino o Iesu ra i sa watung tari lena, ‘Det ra det etabor det dan tandet ra det los a kum utna ra di tabor tar det nami.’”

³⁶ Ra i sa watung tar a kum wasiso ri, o Pol tomo nama taro rop det kis butkeke, ma det wararing.

³⁷ Numur det rop det tangis, det tal pas o Pol, ma det gom a papor wano.

³⁸ Ma a taro det tupunuk doko, uni i sa inanos tar det lena ka det in tamtama tomo melet mo. Ra numur det wan tulu ru i sur in kas una sip.