3 Jon 1 - Nupela Testamen long tokples Kandas

¹ Iau, o Jon, a mugumugu, a tumtumus torom ui, a wakak na pasang o Gaius, ra a nem mulus ui.

² A wakak na pasang, a wararing sur ui, sur anum a wakak na nilaun ma anum a wakak na kinkinis, elar nama niom ra i laun wakak.

³ A gas doko ra a ramano kum tistisin dat det wanpat, ma det wasiso puaso un ui lena, u mur a lingmulusino, ma anum a nilaun i elar nami.

⁴ Ra a longoro i lena a kum nutnutung, anundet a nilaun i mur a lingmulusino, a gas doko, ma katu utna melet mo ra in ulabo anung a gasgas.

A warut torom a kum tistisin dat ra det wan nama Wakak na Wasiso

⁵ A wakak na pasang, u lingmulus una pinapam ra u pami torom a kum tistisin dat, ra det usiro pat torom ui.

⁶ Ma ara taro tagun det, det wanpat nin, det wasiso puaso torom a taro na lotu una num a marmaris. I wakak ra un warut det nam lako kum utna una nundet a inawan. A petutna ra, o God i gas uni.

⁷ Det wan nama risan o Karisito, ra ka det los tu warut tan a taro ra ka det nurnur.

⁸ Lenra, i wakak sur dat in warut a ngas na taro ra, sur dat in papam tomo nam det sur a lingmulusino in nan sarara.

A nilaun anun o Diotrepes ma o Dimitrius

⁹ A sa tumus tar a pas torom a taro na lotu una num a tamon, ikut o Diotrepes i ra i nem doko i sur in mugumugu anumot, ke ser longoro met.

¹⁰ Ra an nanpat, an inanos mot una kum petutna ra i ser pami, a kum sakino wasiso eno i sa watung tari un met. Ma awu sur i kut ra, i kai ri, ke ser gas pas a kum tistisin dat ra det wanpat nama Wakak na Wasiso, ma i turbat det ra det nem na gas pas det. Ra taio i nem na gas pas det, o Diotrepes in umana ru i gusun a lotu.

¹¹ A wakak na pasang, gong u tamtama ususer una sakino petutna, un muri kut a wakakino. Osi ra i pam a wakakino, i anun o God, ma osi ra i pam a sakino, ke tasman o God.

¹² A taro rop det watungi un o Dimitrius lena, i ara wakak na musano. A magirano ra i mur a lingmulusino i ese i kai lena i ara wakak na musano. Met kai met wasiso talapor uni, ma u tasmani lena, anumet a kum wasiso i lingmulus.

A ururop na wasiso

¹³ A susut na utna ra an tumusi torom ui, ikut ka nemi sur an tumtumus torom ui namin nepen.

¹⁴ Ikut a nuki lena, milau dar in tamtama tomo, sur dar ut dar in wasiso tomo.

¹⁵ A malmal torom ui. A kum paspasam taginin, det pitar anundet a marmaris torom ui. Ra ui kai, un pitar anung a marmaris torom a kum paspasan dar rop ra det kis tiro iai.