2 Timoti 2 - Nupela Testamen long tokples Kandas

A wakak na tene inaim anun o Karisito Iesu

¹ Timoti, o nutunglik una nurnur, un tur dekdek una marmaris anun o God, ra dat losi tan o Karisito Iesu.

² A kum etowo ra u sa longoro pasi tang umatan a susut na taro, un ususer lako taro nami. A taro ra u nurnur un det lena det in pet lar pasi sur det in ususer lako taro kai nami.

³ Un tur tomo nam met una kum mamaut, elar nama wakak na tene inaim anun o Karisito Iesu.

⁴ A wakak na tene inaim ken balon una kum pinapam anun a taro oros kut, awu. In pami ut anun a pinapam sur in ugasgas anun a mugumugu.

⁵ Lenkutkai ra, a tene kinalabor ra i kalabor una ililu, ken los tu ikul ra ke mur a kum warkurai ina ililu.

⁶ A tene minarut ra i papam dekdek, i ut in pasong mugu a win ana kinobot ra in taka.

⁷ Un ser nuk ukai a kum wasiso ri a tumusi torom ui, uni a Labino ut in utalapor a kukuraino torom ui.

⁸ Un nuk pas o Iesu Karisito, i ra tagun a kabotaro anun o Dewid, ra i katutur melet gusun a minat. Iri a Wakak na Wasiso ra a warawai nami.

⁹ Ma a taramo a ngunungut, ma di ker iau elar nama tene sakino, uni a warawai nama Wakak na Wasiso. Ikut, a wasiso anun o God ka din turbat lar pasi.

¹⁰ I mo ra a taramo a kum ngunungut, ikut a tur dekdek ut, sur det ra o God i sa pilok pas det, det kai det in nurnur un o Karisito Iesu ma in ulaun pas det, ma det in los a minamar tukum.

¹¹ A wasiso ri an watungi tam, i lingmulus sakit: Ra dat in mat tomo nam o Karisito Iesu, dat in laun tomo kai nami.

¹² Ra dat in taramo a ngunungut tomo nami, dat in warkurai tomo utkai nami una nun a matanitu. Ra dat in ipul ru i, i kai in ipul ru dat kut.

¹³ Ra ka dat in pam sot pas anundat a liliman sur dat in mur o Karisito Iesu, i ut in tur dekdek una nun a liliman, uni ken pet lari sur in kutus anun a liliman.

A lingmulus na tene pinapam

¹⁴ Gong u mana nama wasiso torom anum a taro nama kum etowo ri. Un utumarong det umatan o God lena, gong det engaras una kum wasiso, uni ke gas un tu utna, ma in ban laulau det ra det longoro i.

¹⁵ Un pitar tar ui ut torom o God ma un dekdek sur ui a lingmulus na tene pinapam, ra o God in gas nami. A tene pinapam ra ke ser maimai una nun a pinapam, ma i palos kodos a lingmulus na wasiso.

¹⁶ Un nan gisen gusun a kum wasiso ra ke sot nama nemnem anun o God, uni a taro ra det balon una ngas na wasiso lenra, det in nan bakbak ma det in bakbak doko gusun o God.

¹⁷ Anundet a etowo in nan sarara elar nama laulau na inangon ra i tangangos nanan. O Emeneus ma o Piletus aru tagun det,

¹⁸ ra der sa wan raro gusun a lingmulus. Der watungi lena, dat sa katutur melet gusun a minat. A wasiso ri anunder, i ban laulau a nurnur anun a ramano taro.

¹⁹ Ikut, o God i sa ubek tar a kibin a nurnur ra ken tugunu, ma di sa tumus tar a wasiso uni lena, “A Labino i tasman det ra anunu.” Nam 16:5 Ma di sa tumus tari kai lena, “I ra i watungi lena i anun a Labino, in nan gisen gusun a sakino petutna.”

²⁰ Un ara labino rumu, a kum ngas na dis kura det kis. A ramano di pam det nama silwa ma nama gol, ma a ramano kai di pam det nama duwai ma nama piopap. A ramano kum dis sur a kum lamlabino bung kut ma a ramano kai sur a kum dur na utna kut.

²¹ Ra taio in utalapor pas anun a nilaun gusun a kum dur na petutna, in elar nama dis tagun a kum lamlabino bung. Uni, i, anun a Labino, ra a Labino in papam una nun a nilaun sur in pam a pinapam anun a Labino, ma i sa kis waninar sur in pam a kum wakak na pinapam.

²² Un nan gisen gusun a kum nuknuk na barman, ma un mur a tokodos na petutna, ma a nurnur, ma a marmaris ma a malmal, tomo nam det ra det ser wararing torom a Labino nama tokodos na nuknukin det.

²³ Un nan gisen gusun a kum wasiso ororos ra katu kukuraino, uni det in ukatutur a kum wasiso na engaras.

²⁴ A tultul anun a Labino gong i ser engaras, ikut in wakak na tene ususer, in pam a wakakino torom a taro rop, ma in ese anun a wowowon na petutna torom a taro ra i ukodos det.

²⁵ Det ra ka det nem anun a etowo, in ukodos wowowon det, sako o God in mulaot pas det sur det in nukpukus, ma det in tasman a lingmulusino.

²⁶ Numur det in nuknuk wakak, ra det in pirso gusun in nukun anun o Satan, ra det sa iru taru uni, ma det ser muri.