2 Timoti 1 - Nupela Testamen long tokples Kandas

¹ Iau o Pol, a aposel anun o Karisito Iesu una nemnem anun o God, sur an wasiso talapor una nilaun ra i sa uliliman tari torom dat un o Karisito Iesu.

² A tumus a pas ri torom ui Timoti, a wakak na nutunglik una nurnur. A marmaris ma a wakak na petutna ma a malmal, tan o God a Tamandat ma o Karisito Iesu anundat a Labino, in kis tomo nam ui.

O Pol i udekdek a nurnur anun o Timoti

³ Una kum mirum ma a waspi, a ser wararing sur ui, ma a ser watung wakak torom o God. I ra a papam toromi nama tokodos na ninunuk, elar nama kum tumtubung tagun numugu.

⁴ A nuk melet pasi ra u tangis iau, ma a nem doko i sur an tama ui sur an bukus nama gasgas.

⁵ A nuk pas anum a lingmulus na nurnur, ra i elar nama nurnur anun aru ino ri, o tubum o Lois ma o nam o Unis. A tasmani lena a ngas na nurnur ra, kura kai un ui.

⁶ I mo ra a inanos ui melet sur un ukatutur melet anum a etabor, elar nama sungun ra di wupi ra i kunabor. A etabor ra, o God i tabor ui nami una bung ra a ubek aru lamang netes un ui.

⁷ Uni o God ke tabor dat nama nion na nginara, awu. I tabor dat nama Tokodos na Nion ra i pitar a dekdek torom dat, ma a marmaris ma a petutna ra ara taktakai in tamtamabat wakak anun a nilaun.

⁸ Gong u maimai sur un wasiso talapor una nundat a Labino, ma gong u maimai un iau, ra uniri a kis una karabus una risano. Ikut, un waninar sur ui kai, un taramo a ngunungut una Wakak na Wasiso tomo nam iau. Ra un taramo a ngunungut, o God ut in pitar a dekdek torom ui.

⁹ I ut i sa ulaun pas dat, ma i kabo pas dat sur a nilaun ra katu dur uni. Awu sur i kibino una nundat a kum wakak na pinapam, awu. I kibino ut una nun a nemnem, ma anun a marmaris, ra i pitar tari torom dat un o Karisito Iesu. Numugu utmakai, ra ke ukisi utmakai a rakrakon bual, i maris mugu dat.

¹⁰ Ra uniri, dat sa tama a marmaris anun o God torom dat, una inawan pat anun anundat a Tene Ulaun, o Karisito Iesu, i ra i urop ru a minat. Ma una Wakak na Wasiso, i upuaso a nilaun tukum sur in nanpat talapor.

¹¹ O God i sa pilok pas iau sur an tene warawai nama Wakak na Wasiso, an aposel ma an tene ususer kai uni.

¹² Iri a kibino ra a taramo a ngunungut lenri. Ikut, ka maimai, uni a tasman o naro ra a nurnur uni, ma a tasman mulusi lena, in pet lar pasi sur in tamtamabat a pinapam, ra i sa pitar tari tang, tuk una bung na warkurai.

¹³ A tokodos na etowo ra a sa ususer tar ui nami, i elar nama wakak na malalar sur un muri. Un muri tomo nama nurnur ma a marmaris. A nurnur ma a marmaris anundat, ra kura dat un o Karisito Iesu.

¹⁴ Una dekdekin a Tokodos na Nion ra i kis un dat, un tamtamabat wakak a Wakak na Wasiso ra o God i sa pitar tari tam.

¹⁵ U tasmani lena a taro rop, ra det kis una papor Asia, det sa wan pas gusun iau. O Pigelus ma o Emogenes aru tagun det.

¹⁶ A wararing sur o God in maris o Onesiporus det tamtamano, uni i ser ugasgas iau, ma ke maimai un iau ra a kis una karabus.

¹⁷ Ra i wanpat tong o Rom i sisio nanan ut sur iau, tuk i sio pas iau.

¹⁸ A wararing sur a Labino in maris o Onesiporus una bung na warkurai. U sa tasman wakak a kum pinapam na warut ra i sa pam tari torom iau tiro o Epeses.