2 Jon 1 - Nupela Testamen long tokples Kandas

¹ Iau o Jon, ara mugumugu, a tumtumus torom ui, a ino ra o God i sa pilok pas ui, tomo nama kum nutnutum, ra a nem mulus mot. Awu sur iau kut, met rop kai ra met tasman a lingmulusino met nem mot.

² Met nem mot kibino una lingmulusino ra kuri un dat, ma in kis tukum un dat.

³ A marmaris, a wakak na petutna ma a malmal tan o God a Tamandat ma o Iesu Karisito o Nutunu, in kis torom dat ra dat kis una lingmulusino ma dat nem etetalai dat.

Dat in nem etetalai dat

⁴ A gas doko ra a longoro i lena, a ramano kum nutnutum, det mur a lingmulusino, elar nama warkurai ra a Tamandat i sa pitar tari torom dat.

⁵ A wakak na ino, uniri a saring ui, sur dat in nem etetalai dat. Awu sur a tumus tu matok na warkurai torom ui, awu. A warkurai kut ra dat sa longoro tari tagun numugu.

⁶ Ra dat nem a taro dat in ese i lenri: Dat in mur a kum warkurai anun o God. Anun a warkurai, ra tagun numugu mot sa longoro tari i lenri, mot in mur a petutna na marmaris.

Mot in tumarong mot gusun a kum tene torotoro

⁷ A susut na tene torotoro det sa wan sarara nin una rakrakon bual. Det ipul kut lena, o Iesu Karisito awu sur i wanpat a musano mulus. A ngas na musano ra, i a tene torotoro, ma a ebar anun o Karisito.

⁸ Mot in tumarong mot sur gong mot ubek ru asau ra mot sa dekdek pasi. Mot in tur dekdek sur mot in los pas anumot a kudulano ikul.

⁹ Osi ra i wan gisen pas gusun a kum etowo anun o Karisito ma ke muri, o God awu sur kura uni. Ikut osi ra i mur a kum etowo ri, a Tamandat ma o Nutunu kura der uni.

¹⁰ Ra taio in nan torom mot nam tu ngas na etowo gisen, gong mot gas pasi ma gong mot ben ruki una numot a kum rumu.

¹¹ Osi ra i gas pasi, i ara pasano una nun a kum sakino pinapam.

A ururop na wasiso

¹² A susut na utna ra an tumusi torom mot, ikut ka nemi sur an tumtumus una dono pepa namin nepen. A nuki sur an nan ut torom mot, ma dat ut dat in wasiso tomo, sur anundat a gasgas in bukus.

¹³ A kum nutnutun o tisim ino, ra o God i sa pilok pasi, det pitar anundet a marmaris torom ui.