1 Timoti 2 - Nupela Testamen long tokples Kandas

A etowo una kisapi na lotu

¹ A mugano utna, a nemi sur a taro na nurnur det in wararing, nama niaring sur a utna det sibo suri, a niaring sur a taro, ma a niaring na watung wakak torom o God. Mot in wararing lenra sur a taro rop,

² ma sur a kum king ma a kum mugumugu rop, sur dat in kis wowowon nama malmal, ma dat in mur a petutna ra i wakak umatan o God, ma dat in urur torom o God.

³ Ra mot in pami lenri, in wakak sakit ra o God, anundat a Tene Ulaun, in gas nami.

⁴ I nemi sur in ulaun a taro rop, ma det in tasman a lingmulusino.

⁵ Uni ara God sot kut, ma ara sot kut kai ra i dat tomo o God ma a taro, a musano ri o Karisito Iesu,

⁶ i ra i pitar tar anun a nilaun sur in kul langolango pas a taro rop. Una du bung ra o God i sa kubus tari, o Iesu i ulingmulus a nemnem anun o God lena i nem na ulaun a taro rop.

⁷ Iri a kibino ra o God i pilok pas iau, sur an aposel ma an warawai nama Wakak na Wasiso, ma an ususer a taro ra awu sur a taro Juda nama nurnur mulus. A watung a lingmulus, awu sur a toro.

⁸ A nemi sur a kum musano una kum tamon det in wararing ma det in tulsu a kum lamandet usapat netes, det in pitar tar det torom o God, ma gong det kankan ma gong det engaras.

⁹ A nemi kai sur a wardain det in emar nama malu ra i sot nama ememar anun a wardain. Det in emar nama ememar i upuaso a urur ma a wakak na ninunuk. Gong det iris a lorindet, gong det emar nama kum kamkabaran ra di pami nama gol o a kum wat ra a matandet i ka, ma gong kai det emar nama kum malu na ememar ra a matandet i ka.

¹⁰ A wardain ra det watungi lena det ser lotu torom o God, det in emar nama kum wakak na pinapam.

¹¹ Ra a wardain det in los a etowo tagun a Buk Tabu, i wakak sur det in kis wowowon ma det in unatino pas det.

¹² Ka madek tar tu ino sur in ususer tu musano, ma ka madek tari kai sur tu ino in mugu tu musano. I wakak sur in kis wowowon kut.

¹³ Uni o God i ukis mugu o Adam ra numur o Iwa.

¹⁴ Awu sur o Adam ra o Satan i toro pasi. Awu! O Iwa kut ra o Satan i toro i ra i puku, ra i pam a sakino.

¹⁵ Din ulaun a wardain kibino una usus. Din ulaun det ra det ser tur dekdek una nurnur, ma una marmaris. Det ra, det ser mur a petutna ra o God i nemi, ma a petutna ra i sot sur a wardain det in muri.