1 Tesalonaika 5 - Nupela Testamen long tokples Kandas

Dat in kis na waninar sur a inawan pat anun a Labino

¹ A kum tistisi metul, ka metul in tumtumus torom mot una du bung ma a bung ra a Labino in nanpat uni.

² Uni mot sa tasman wakaki lena, a bung anun a Labino in nanpat kisin, elar nama tene wolong una mirum.

³ Ra a taro det in watungi lenri, “Ai, ka dat taramo tu maut. A wakak na nilaun kut ri dat taramo i,” a iniru in nanpat kisin torom det, elar nama ngunungut ra a ino i taramo i ra milau sur in usus. Ka det in kalabor eno pas gusun a iniru.

⁴ Ikut mot, a kum tistisi metul, a bung ra ken ukisin mot, elar nama tene wolong, uni awu sur mot kis una dumirum.

⁵ Mot rop a kum nutnutun a talapor ma a kum nutnutun a waspi. Awu sur dat tagun a mirum o tagun a dumirum.

⁶ I mo ra gong dat elar nam ara taro ra det inep dumun. Dat in koikoi ma dat in tamtamabat wakak anundat a nilaun.

⁷ Uni det ra det inep dumun, det ser inep una mirum, ma det ra det ininum, det ser inum una mirum.

⁸ Ikut dat tagun a waspi, i wakak sur dat in tamtamabat wakak anundat a nilaun. Dat in emar nama nurnur ma a marmaris sur in tamtamabat dat, elar nama du pino aen ra a tene inaim i ubek bat a romrobono nami. Ma dat in emar kai nama kinkinis langlang nama nurnur sur o God in ulaun dat, elar nama tene inaim i ubek bat in lorino nama kukup na inaim.

⁹ Uni o God ke pilok pas dat sur dat in taramo a ngunungut ubalan anun a kankan, awu. I pilok pas dat, sur anundat a Labino o Iesu Karisito in ulaun pas dat.

¹⁰ I mat un dat, sur dat in laun tomo nami, ra in nanpat melet. Dat rop, det ra det laun utmakai ma det ra det sa mat.

¹¹ I mo ra mot in uragot etetalai mot, ma mot in udekdek mot, lenutra mot ser pami.

A kum ururop na etowo

¹² A kum tistisi metul, metul saring mot sur mot in pitar a urur torom anumot a kum mugumugu, ra det papam dekdek epotor tamot, ma det tamtamabat mot una kisapi anun a Labino, ma det ususer mot.

¹³ Mot in ese a labino urur ma a marmaris torom det, kibino una nundet a pinapam. Ma mot in kis na malmal etetalai.

¹⁴ A kum tistisi metul, metul saring mot sur mot in tumarong a kum tubunu wok na taro, mot in uragot det ra det ser ngara, mot in warut det ra ka det dekdek una nurnur, ma mot in ese a wowowon na petutna torom a taro rop.

¹⁵ Gong mot balu a sakino nama sakino. Mot in dekdek sur mot in pam a wakakino etetalai torom mot, ma torom a taro rop kai.

¹⁶ Mot in ser gas.

¹⁷ Gong mot mana nama niaring.

¹⁸ Mot in watung wakak torom o God un asau rop ra i wanpat torom mot, uni iri a nemnem ut anun o God torom mot, a taro anun o Karisito Iesu.

¹⁹ Gong mot turbat a pinapam anun a Tokodos na Nion.

²⁰ Gong mot nuk penpen una kum wasiso na poropet.

²¹ Mot in lar rop a kum wasiso ma a kum petutna. Mot in utur ukai a wakakino.

²² Ma mot in nan gisen gusun a kum sakino rop.

²³ Metul wararing sur o God ut, a God na malmal, in uwakak pas anumot a nilaun, sur mot in tokodos rop umatano. Metul wararing kai sur o God in tamtamabat a niomot, a nuknuki mot ma a pinimot, sur gong tu etakun in los mot una bung ra anundat a Labino o Iesu Karisito in milet uni.

²⁴ O naro ra i kabo pas mot in pami lenutra, uni i lingmulus.

²⁵ A kum tistisi metul, mot in wararing sur metul.

²⁶ Mot in nem a kum tistisi mot nama egom na marmaris, ma mot in pami nama tokodos na petutna.

²⁷ A saring mot nama risan a Labino sur mot in luk a pas ri torom a kum tistisin dat rop.

²⁸ A marmaris anun anundat a Labino o Iesu Karisito in kis tomo nam mot.