1 Korin 8 - Nupela Testamen long tokples Kandas

A kum utna ra di sa etabor taru nami torom a kum torotoro na god

¹ An inanos mot una kum utna na inangon ra di sa etabor taru nami torom a kum torotoro na god. Dat tasmani lena, dat rop dat sa mananos. A mananos i ser pam pat a petutna sur taio in dat walos in lorino, ikut a marmaris i ser pam pat a petutna sur taio in udekdek a taro.

² Ra taio i nuki lena i sa mananos doko un tu utna, anun a mananos ke sot utmakai.

³ Ikut, ra taio i nem o God, o God i sa tasman o naro ra.

⁴ An inanos mot una ngasino ra a taro det ser pami ra det wan a kum utna, ra di sa etabor taru nami torom a kum torotoro na god. Dat tasmani lena a toktok i a utna oros kut tagun a rakrakon bual, awu sur i laun. Dat tasmani lena ara God sot kut, ma kataio melet.

⁵ A lingmulus ra a susut na utna sapat una langit ma nin una rakrakon bual, di watung det nama kum god, ma a kum lamlabino.

⁶ Ikut, dat tasmani lena ara God kut, a Tamandat, i ra a kibin a kum utna rop, ma i ra dat laun suri. Ma dat tasmani lena ara Labino kut, i o Iesu Karisito, i ra i ukis a kum utna rop, ma i pitar tar a nilaun torom dat.

⁷ Ikut, awu sur a taro rop det tasman a utna ri. A ramano kum tene nurnur, numugu ra ka det nurnur utmakai, det ser mur a petutna ra det etabor torom a kum torotoro na god. Ma tuk uniri, ra det wan a utna ra taio i sa etabor taru nami torom a kum torotoro na god, det nuki lena, det ut det lotu torom a kum torotoro na god. Det taramo i lena a nuknukin det i takun det lena det pam a sakino.

⁸ Ikut, a utna na inangon ke warut dat sur dat in tokodos umatan o God. Ra ka dat wangon, ke ban laulau dat umatan o God, ma ra dat in nangon kai, ken warut dat sur dat in wakak umatan o God.

⁹ Mot langolango sur mot in nan a utna ra taio i sa etabor taru nami torom a kum torotoro na god. Ikut mot in tumarong mot, sur gong anumot a petutna ra, in ben tar det ra anundet a nurnur ke dekdek, sur det in puku.

¹⁰ Ui, u sa mananos sur un nangon una rumu na etabor anun a torotoro na god, ma a nuknukim awu sur in takun ui uni. Ikut ra un nangon tiro iai, ma o naro ra anun a nurnur ke dekdek in tama ui, un ben tari, sur i kai, in nan a utna ra di sa etabor taru nami torom a kum torotoro na god, ra in taramo i lena, a nuknukino i takuni lena, i pam a sakino.

¹¹ Anum a mananos in ban laulau a musano ra anun a nurnur ke dekdek. A musano ra, a tisindat ra o Karisito i mat suri.

¹² Ra mot pam a sakino lenra torom tu tisindat, sur in pam a utna ra a nuknukino in takuni uni, mot pam a sakino torom o Karisito.

¹³ Ra a utna ra a wani, in upuku a tising una sakino, kan nan meleti mo tu du wewegua, sur gong a upuku a tising una sakino petutna.