1 Korin 16 - Nupela Testamen long tokples Kandas

Anundet a etabor torom a taro na lotu sapat o Jerusalem

¹ An inanos mot un asau ra mot in pami nama mani ra mot woro tomo i sur a taro anun o God ra det kis sapat o Jerusalem. Mot in pami elar nami ra a sa inanos tar a taro na lotu una kum tamon tong una papor Galesia sur det in pami.

² Una kum mugano bung una rara wik, mot rop taktakai mot in ubek gisen ru tu mani tagun anumot a mani. Det ra det pam pat a labino mani det in pitar a labino, ma det ra det pam pat a natino det in pitar a natino. Mot in ulengi, sako ra an nanpat, mot in woro tomo i maragom a mani.

³ Mot in pilok pas lako taro ra mot nurnur un det sur det in los anumot a etabor. Ma ra an nanpat tiro, an pitar tar a kum pas na wasiso talapor torom det sur det in losi tomo nam anumot a etabor, ma an tulu ru det nami usapat o Jerusalem.

⁴ Ra i wakak sur iau kai an nan, met in nan tomo.

O Pol i inanos det una nun a inawan

⁵ An nan utong una kum tamon una papor Masedonia. Ma numur an nan kai utiro torom mot, uni an nan ut utong o Masedonia.

⁶ Kutiro an kis lilik pas ut tomo nam mot tiro iai, o kutiro an kis tuk ra a kum kalang na kotokoto ma a labino wuwu in rop, ra numur mot in warut iau una nung a inawan sur a kum tamon gisen bulung ra an nan iai.

⁷ Ka nemi sur an nan torom mot uniri, ra an tur pas kut nisamot una nung a inawan. Ra a Labino in mulaot iau, a nemi sur an kis suano pasi ut nisamot.

⁸ An kis nin o Epeses tuk una Bung na Pentikos,

⁹ uni a kisapi i sa papos sur anung a pinapam in lubung ma in wu, ma a susut na taro kai det nem na turbati.

¹⁰ Ra o Timoti in nanpat torom mot, mot in tamtamabati sur gong i ngara ra i kis nisamot, uni i pam a pinapam anun a Labino, elar nam iau kai a pami.

¹¹ Gong mot tama pisopiso i. Ra in milet urin torom iau, mot in tulu ru i nama malmal. Ma a kis langlang suri, ra in nanpat tomo nama kum tistisin dat.

¹² A nemi sur an inanos mot una tisindat o Apolos. A saring dekdeki sur in nan tomo nama kum tistisin dat torom mot, ikut ke nem na wan utmakai. Numur ra tu kisapi in papos toromi, in nan ut.

A kum ururop na wasiso anun o Pol

¹³ Mot in tumarong, ma mot in tur dekdek una nurnur. Mot in elar nama kum dekdek na musano, ra ka det ngara.

¹⁴ Mot in pam a kum utna rop nama marmaris.

¹⁵ Mot sa tasmani lena a taro ra det kis una rumu anun o Stepanas, det a mugano taro ra det nukpukus tiro una papor Akaia, ma det sa pitar tar det sur det in warut a taro anun o God. A saring mot, a kum tistising,

¹⁶ sur mot in unatino pas mot torom a ngas na taro lenra, ma torom det ra det papam tomo nam det, ma det dekdek una pinapam ra.

¹⁷ A gas una inawan pat urin anun o Stepanas, o Potunatus ma o Akaikas, uni detul warut iau ra ka mot kis tomo nam iau.

¹⁸ Detul ugasgas pas a niong, ma a niomot kai. I wakak ra mot in tama lele a ngas na taro lenra, ma mot in pitar a urur torom det.

¹⁹ A taro na lotu una kum tamon nin una papor Asia det pitar anundet a marmaris torom mot. O Akuila ma o Prisila ma a taro na lotu kai ra det ser lotu tomo una nunder a rumu, det pitar anundet a labino marmaris torom mot una risan a Labino.

²⁰ A kum tistisin dat rop det pitar anundet a marmaris torom mot. Ra mot etorom, mot in nem etetalai mot nama egom na marmaris, ma mot in pami nama tokodos na petutna.

²¹ Anung a nat na wasiso na marmaris ri, iau ut, o Pol, a tumusi torom mot nama lamang.

²² Osi ra ke nem a Labino, in iru tukum. Wan urin a Labino!

²³ A marmaris anun a Labino o Iesu in kis tomo nam mot.

²⁴ Anung a marmaris torom mot rop un o Karisito Iesu. Amen.