Wuj Richin ri Rut 3 - Kaqchiquel Bible

Ri xbanatej toq ri Booz niwer akuchi nich'ay ri trigo

¹ Jun q'ij ri Noemí xubij chire ri Rut: Wal yin, kan ruk'amon k'a chi ninkanoj jun awachijil, richin kikoten xkak'ase' y kan k'o ok ri xtakusaj.

² Y yin xinwetamaj yan chi ri Booz ri achoq ik'in xapich'olin-wi ri kan xak'oje' kik'in ri raj-ik'a', rija' kan jun qach'alal y wakami chaq'a' rija' nibe richin niberuxupuj ri cebada.

³ Wakami k'a tabana' ri ninbij chawe yin: Katatin-el, taya-el jubulej taq aq'om chawij y takusaj-el ri más jebel atziaq; k'ari' kabiyin akuchi k'o-wi rija'. Xaxe man tak'ut-awi' chuwech toq k'a man jani tiwa' y tuk'ya'.

⁴ Toq wayneq chik tatz'eta' jebel akuchi xtikotz'e-wi-qa, y k'ari' napek-q'anej ri ruq'u' ri chiraqen-qa y chiri' yakotz'e-wi-qa rat. Y rija' xtubij k'a chawe ri achike k'atzinel richin naben, xcha' ri Noemí chire.

⁵ Y ri Rut xubij chi kan xtuben ronojel ri xbix-el chire.

⁶ Y ri Rut xbe k'a y kan xuben k'a ronojel ri rubin-el ri ralite' chire.

⁷ Toq ri Booz xwa-xuk'ya' yan, kan janila k'a nikikot y k'ari' xbe-apo chuxikin ri cebada y chiri' xkotz'e-wi-qa y xuchop k'a waran. K'ari' ri Rut man niq'ajan ta xjel-apo ri akuchi kotz'ol-wi ri Booz, xupek-q'anej ri ruq'u' ri chiraqen-qa y xkotz'e-qa chiri'.

⁸ Y pa taq nik'aj-aq'a' la'eq ri' ri Booz xrikiro', xuna' ruwech y xupiskolij-ri' y jari' toq xutz'et chi k'o jun ixoq ri kotz'ol ri chiraqen-qa.

⁹ Y ri Booz xuk'utuj achike rija'. Y ri ixoq xubij: Táta, ja yin in Rut. Y yin wetaman chi rat at jun rach'alal kan ri ánima wachijil, y roma ri' nink'utuj utzil chawe chi yak'ule' ta wik'in. Achi'el in rukuchun ri rutza'n ri aq'u', keri' ta ri to'onik ri xtaya' chuwe, xcha' ri Rut.

¹⁰ Y ri Booz xubij: Ja ri Jehová xturtisan awichin, roma rat kan k'iy wi utzilej taq banobel abanon rik'in ri awalite'; jak'a re banobel richin wakami kan jare' k'a ri más utz chuwech ronojel. Rik'in re', nak'ut chi at jun utzilej ixoq, roma rat man xatzu' ta ruwech jun achin ri k'a ala' na, beyom o man jun k'o rik'in, richin chi yak'ule' ta rik'in.

¹¹ Wakami k'a, man taxibij-awi'. Yin kan xkatinto' k'a rik'in ri xabij chuwe, roma kan konojel ri nuwinaq ketaman chi rat kan at jun jebelej ixoq.

¹² Kan qitzij na wi chi yin in rach'alal kan ri awachijil, man rik'in ri', k'a k'o kan jun chik rach'alal ri más naqaj, y ja na rija' xtibin chi wi nrajo' nok awachijil y ato'onel.

¹³ Tak'owisaj k'a re jun tokoq'a' re' wawe' y toq xtiseqer-pe, xtinchojmirisaj. Wi rija' nrajo' chi nik'ule' awik'in, utz k'ari'; y wi man nrajo' ta, pa rubi' k'a ri Jehová, yin xkik'ule' awik'in. Wakami k'a, katuxlan y k'a nimaq'a' yabe, xcha' ri Booz chire.

¹⁴ Y keri' xwer chik k'a qa chiraqen ri Booz y k'a q'equ'm na k'a toq xyakatej-el, richin chi man jun nitz'eton-el, roma ri Booz xubij chi man jun tetaman chi xk'oje' jun ixoq chiri'.

¹⁵ Chuqa' xubij chire ri Rut: Tarik'a-qa pan ulew la peraj tzieq la aq'un, xcha'. Y ri Rut kan xuben k'a ri xbix chire, y ri Booz xuya-el jubama ka'i' arroba cebada chire. Y k'ari' xuyek-el richin chi xtzolej pa tinamit.

¹⁶ Y toq xapon rik'in ri ralite', ri ralite' xuk'utuj chire: ¿Achike xbanatej, wal yin?, xcha'. Y ri Rut xutzijoj k'a ronojel ri achike xubij ri Booz chire.

¹⁷ Y chuqa' xubij chi ri Booz xuya-pe chire ri jubama ka'i' arroba cebada ri ruk'uan y xubij chi tuk'uaj-el ri cebada ri' richin chi ri Rut man nitzolej choj keri' rik'in ri ralite'.

¹⁸ K'ari' ri Noemí xubij: Wakami k'a wali', tawoyobej achike xtibanatej; yin wetaman chi ri Booz man xtuxlan ta re wakami k'a toq ruchojmirisan na ronojel, xcha'.