Wuj Richin ri Nimalej Bix 6 - Kaqchiquel Bible

¹ Rat ri más at jebel ok chiqakojol roj, ¿akuchi k'a xbe-wi ri awachijil? ¿Akuchi k'a xbe-wi ri awajowanel?, roma niqajo' yojbe chawij richin nibeqakanoj.

Ri ixjayilonel nubij:

² Ri wajowanel xa k'o wawe' wik'in, roma kan ja yin ri achi'el ruqejoj ri janila jubul. Kan k'o k'a wawe' chupan ri ruqejoj, richin yerumol kotz'i'j lirio.

³ Yin kan irichin rija', y rija' kan wichin yin, rokik yerumol kotz'i'j lirio.

Ri achijlonel nubij:

⁴ Rat, wajowanel yin, kan janila at jebel ok achi'el ri tinamit Tirsá. Kan janila at rayixel achi'el ri tinamit Jerusalem. Nawelesaj ri wuchuq'a', roma kan at achi'el jun tzobaj aj-labal, ri kicholajen-ki'.

⁵ Kan tajech'ej k'a ri atzubal wik'in yin, roma kan yinach'ek. Ri rusumal-awi' yesilon achi'el taq tzobaj tzuntzun ri yetzopiyaj yexule-pe pa juyu' richin Galaad.

⁶ Ri awey kan e seq e seq, achi'el jun tzobaj karne'l ri k'a juba' kebe'atin-pe. Chikijujunal ri awey kan taq e kua'ch, y man jun chike rije' ruyon ta k'o.

⁷ Ri apalej keq niq'alajin-pe chupan ri a-velo; kan achi'el nik'ajta'q taq granada nitzu'un.

⁸ Ek'o oxk'al ixoqi' e reina ri e wixjayil, y e jumuch' nu-concubina,*f2* y ri xtani' man e ajlatel ta.

⁹ Jak'a rat, wajowanel yin, kan xaxe rat ri k'o aq'ij chikikojol, rat kan at jebel ok. Rat at juney xten rik'in ri ate', y kan janila yarajo'. Toq ri ch'aqa' chik xtani' yatkitz'et, nikibij chawe chi jebel ruwa-aq'ij; ri reina y ri ch'aqa' chik ixoqi' nikiya' aq'ij.

¹⁰ Rat kan at jebel ok achi'el ri kaj toq niseqer-pe. Kan janila at jebel ok achi'el ri ik', y yayik'lun achi'el ri q'ij. Rat kan at jebejoj ok achi'el ri ch'umila'.

¹¹ Xibe pa nuqejoj akuchi ek'o-wi ri nogal pa taq'aj kojol juyu', richin xinbentz'eta' wi rex chik kibanon. Xinbentz'eta' wi kichapon yesijan-pe ri uva y wi yesijan chik ri granada.

¹² Kan jari' toq xinna' jun nimalej kikoten, achi'el xa ta ink'o chupan jun carruaje ri janila rejqalen, y man wetaman ta achike rubanik xinapon chiri'.

Ri kachibil nikibij:

¹³ Kaxajo' k'a rat, ixjayilonel richin ri Salomón, kaxajo'. Kaxajo' richin yatqatz'et. ¿Achike roma niwajo' yinitz'et chi yin yixajo'? ¿Achike roma niwajo' yinitz'et yixajo' achi'el nuben jun xten toq nik'ule'?