Wuj Richin ri Nimalej Bix 3 - Kaqchiquel Bible

¹ Ri tokoq'a' xinkanoj pa nuwarabel, ri ninwajo' yin. Kan xinkanoj, jak'a man xinwil ta.

² K'ari' xiyakatej-q'anej y xinkanoj chupan chijun tinamit. Xinkanoj pa taq bey y chupan nima'q ruwech taq bey richin molojri'il. Kan xinkanoj k'a, jak'a man xinwil ta.

³ Xink'utuj k'a chike ri chajinela' ri yechajin ri tinamit, y xink'utuj chike wi kitz'eton ri ninwajo' yin.

⁴ Kan xaxe toq xiq'ax-pe chiri' kik'in rije', jari' toq xinbenk'ulu-pe ri ninwajo' yin. Kan jari' xintzeqeba-wi' chuqul, y man xinwisq'opej ta kan, k'a toq xojapon pa rachoch ri nte', ri akuchi rija' xyawej kan chuwij yin.

⁵ Jak'a rix, xtani' ri ixk'o pa Jerusalem, tiya' itzij pa kibi' ri masat y ri tzuntzun ri ek'o pa k'echelaj, chi man tik'asoj chi'anin ri ajowabel, k'a ja toq xtapon na ri ruq'ijul.

Ri nimaq'ij richin ri k'ulubik Ri kachibil nikibij:

⁶ ¿Achike kami ri jotol-pe pa tz'iran ruwach'ulew, y nuyek poqolaj achi'el ja ta ri sib pa'el chikaj? Rije' kan yejubulin e peteneq rik'in ri ruxla' ri pom, ri mirra y ri jalajoj kiwech jubulej taq aq'om.

⁷ Ri jotol-pe ja ri Salomón tz'uyul-pe pa jun ch'aket, k'amon-pe koma e oxk'al aj-labal, ri kan maneq xibinri'il chikiwech, y ri kan janila e utz ri ek'o pan Israel.

⁸ Konojel rije' kik'uan ri ki-espada. Rije' kan e tijon jebel richin nikiben oyowal. Chikijujunal rije' kan kik'uan ri ki-espada xekipan, richin nikiben oyowal, chuqa' ri chaq'a'.

⁹ Ri ch'aket ri' ja ri rey Salomón ri xbanon, rik'in che' ri peteneq pa Líbano.

¹⁰ Ri pa taq ruxikin, xuya' saqipueq chirij, ri ruraq'alibal ri ch'aket ri' xuya' q'anapueq chirij, y pa ruwi' ri akuchi nitz'uye-wi, xuya' tzieq kaqkoj. Ri pa taq ka'i' ruxikin, ri chuwech y ri chirij, xwiq koma ixoqi' aj-Jerusalem. Y kan xkiben rik'in janila ajowabel.

¹¹ Rix, ixoqi' aj-Sión, kixel-pe richin no'itz'eta' ri rey Salomón. Rija' kan rukusan ri ru-corona ri xya'ox chire roma ri rute' richin ri ruk'ulubik. Y re q'ij re' ja re' ri q'ij más kikoten chire ri ruk'aslen.