Wuj Richin ri Nimalej Bix 1 - Kaqchiquel Bible

Ri ajowabel más utz chuwech ri vino

¹ Chupan re wuj re' nilitej ri nimalej bix richin ri Salomón.

Ri ixjayilonel nubij:

² Wajowanel yin, tatz'ubaj k'a nuchi', roma ri awajowabal rat kan más jebel chuwech ri vino.

³ Ri jubulej taq awaq'om ri nakusaj, kan janila jebel kuxla'. Toq ninatex ri abi', achi'el ja ta ri jubulej aq'om ri kaq'utajineq. Xa roma aj k'a ri' konojel ri xtani' kan janila yatkajo'.

⁴ Kan chi'anin k'a kinak'uaj-el, kan kinak'uaj k'a el pan awachoch. Kan janila k'a yojkikot awik'in rat. Kan niqaya' más rejqalen ri awajowabal rat ke chuwech ri vino. Xa roma aj k'a ri' janila yatajowex.

Ri xtani' nikibij: Ri ixjayilonel nubij:

⁵ Kiniwak'axaj rix, xtani', richin Jerusalem. Yin kan janila in k'atineq roma ri q'ij; man rik'in ri' in jebejoj ok. In q'eq achi'el ri taq jay e banon rik'in tzieq ri ek'o pa tz'iran ruwach'ulew Quedar.*f1* In jebel ok achi'el ri tzieq tasbel rupan ri rachoch ri rey Salomón.

⁶ Man k'a tiqasaj nuq'ij roma in ti q'eq ok, roma xa ja ri q'ij xik'aton. Ri e wach'alal xa xe'oyower wik'in, y xinkiya' kan pa chajiy ulew ri tikon uva chuwech, y roma ri' yin man xitikir ta xinchajij-wi.

⁷ Tabij k'a chuwe rat ri yatajowan wichin: ¿Akuchi k'a xke'ak'uaj-wi ri tzobaj karne'l richin ye'ayuq'uj? ¿Akuchi k'a xke'ak'uaj-wi pa nik'aj-q'ij richin yebe'uxlan, richin chi yin man ninben ta achi'el jun ixoq itzel ruk'aslen, ri nibe-kela' nibe-kela' chikikojol ri ch'aqa' chik yuq'unela'?

Ri achijlonel nubij:

⁸ Wi rat man awetaman ta, rat ri kan janila at jebel ok chikikojol ri ixoqi', tatzeqelibej-el ri retal kaqen ri tzobaj nukarne'l. Y chiri' xke'ayuq'uj ri taq atzuntzun rat chikinaqaj ri taq mo'k ri kichin ri yuq'unela'.

⁹ Chinuwech yin, rat kan más at jebel ok chikiwech ri taq ixoqi' kiej, ri ye'uk'uan ri ru-carruaje ri rey richin Egipto.

¹⁰ Ri apalej kan jebejoj ok nitzu'un chikikojol ri ruwi' taq axikin. Ri aqul kan jebejoj ok niq'alajin rik'in ri awichinaj.

¹¹ Xtiqaben k'a ruwi' taq axikin rik'in q'anapueq; xtiqawiq k'a rik'in saqipueq.

Ri ixjayilonel nubij:

¹² Rokik rat, nu-rey, at kotz'ol, ri jubulej waq'om nijubulin.

¹³ Rat, wajowanel, kan janila yaqa' chinuwech. Kan at achi'el k'a jun ti peqes ri ya'on jubulej q'ayis chupan. Ri ti peqes ri' kan chuwa-nuk'u'x k'a tzeqel-wi.

¹⁴ Janila jebejoj ok yatintz'et, achi'el jun boraj kotz'i'j alhena, ri k'amon-pe chupan ri tiko'n richin uva pan En-gadi.

Ri achijlonel nubij:

¹⁵ Kan at jebejoj ok rat, wajowanel yin, kan janila wi at jebejoj ok. Ri runaq' taq awech kan janila e jebel ok. Kan e achi'el k'a runaq' taq kiwech ri paloma.

Ri ixjayilonel nubij:

¹⁶ Wajowanel yin, rat kan at jebejoj ok; ja' kan janila at jebejoj-ok. Re akuchi oj kotz'ol-wi kan janila buyul. Kan rex-rex k'a rubanon re savana.

¹⁷ Ri kiq'a' ri tiox-che' achi'el xa ta e tem richin ri qachoch, y ri kiq'a' ri k'isis achi'el xa ta ruwi' ri qachoch.