Santiago 4 - Kaqchiquel Bible

Ri itzel taq rayibel

¹ ¿Achike ta k'a nibanon chiwe richin niwetzelaj-iwi' y jantape' k'o oyowalen chi'ikojol? Xa ja ri itzel taq rayibel ri ek'o iwik'in y nikajo' yixkich'ek.

² Rix xa kan janila yixrayin, jak'a xa man jun niwil, y roma ri' yixkamisan. Nirayij chi iwichin ta rix ri xa richin ri iwach'alal, jak'a xa man nok ta iwichin. Roma ri' niben oyowal y yixchapo-iwi' rik'in ch'abel, maneq iwik'in ri niwajo' roma man nik'utuj ta chire ri Dios.

³ O rik'in juba' nik'utuj chire ri Dios. Jak'a xa man nuya' ta chiwe, roma xa man utz ta ri ich'obonik pa ruwi' ri nik'utuj, xa richin itzel taq rayibel ri nik'utuj.

⁴ Rix ri ichapon chi niya' kan ri Dios, ¿man iwetaman ta k'a chi wi nibe iwánima chirij re ruwach'ulew, niq'alajin chi niwetzelaj ri Dios? Roma ri', rix ri iwojqan re ruwach'ulew, kan niq'alajin k'a chi ix etzelanel richin ri Dios.

⁵ Jak'a chupan ri ruch'abel ri Dios, nubij chi rija' janila yojrajo' roma ri ru-espíritu ri ruya'on qik'in.

⁶ Y kan janila rutzil nuya' pa qawi'. Achi'el nubij chupan ri ruch'abel ri tz'ibatel kan, chi ri Dios yeretzelaj y man nuk'en ta kiwech ri nikinimirisaj-ki'. Jak'a ri kiqasan-ki' rija' nuya' ri rutzil pa kiwi'.

⁷ Wakami k'a tiya-iwi' chuxe' rutzij ri Dios, y man tiya' q'ij chire ri Itzel-Wineq. Keri' xa xtanimej-el chiwech.

⁸ Kixjel-apo rik'in ri Dios, y rija' chuqa' xtijel-pe iwik'in. Rix ri yixmakun chuwech ri Dios, tich'ajch'ojirisaj ri ik'aslen. Rix ri ka'i' ik'u'x rik'in ri Dios, tich'ajch'ojirisaj ri iwánima.

⁹ Tina' q'axo'n pa taq iwánima, kixbison y kixoq' roma ri imak. Rix ri yixtze'en roma ri kikoten richin re ruwach'ulew, man chik kixtze'en. Xa kixoq'. Rix ri janila kikoten ina'on chupan re ruwach'ulew, xa kixbison.

¹⁰ Tich'utinirisaj-iwi' chuwech ri Ajaw, y rija' xtunimirisaj iq'ij.

Man kixch'on itzel chirij jun qach'alal

¹¹ Wach'alal, man kixch'on itzel chirij jun qach'alal. Roma wi keri' niben, kan chirij ri pixa' richin ri Dios yixch'on-wi, y niben k'a chire ri pixa' chi man utz ta. Y rik'in ri' niq'et-tzij pa ruwi', y man niben ta ri nubij.

¹² Xaxe ri Dios ri niya'on ri pixa', y xaxe rija' ri niq'aton-tzij pa ruwi'. Y xaxe rija' nitikir yojkolon, y xaxe chuqa' rija' ri nitikir yojtaqon pa q'aq'. Y rat, ¿achike roma toq nabij chi ri jun chik man utz ta rubanon ri ruk'aslen chuwech ri Dios?

Man tinimirisaj-iwi' rik'in ri k'o chi nibebana'

¹³ Y wakami tiwak'axaj k'a rix ri nibij: Wakami o chua'q yojbe pa jun chik tinamit richin yojk'oje' chiri' jun juna', richin yojloq'on y yojk'ayin richin niqach'ek qaméro, yixcha'.

¹⁴ Chiwech rix jebel ri ich'obonik, jak'a xa man iwetaman ta achike xtik'uluwachij ri chua'q-kabij. Roma ri qak'aslen xa achi'el jun ti sib ri nik'oje-el juba', y xa chi'anin nik'is-el.

¹⁵ Roma ri' toq rix nich'ob chi k'o jun niwajo' niben, tibij k'a: Wi ri ajaw xtuya' q'ij y yojk'ase', kan xtiqaben k'a ri niqach'ob, kixcha'.

¹⁶ Jak'a rix xa man keri' ta nibij. Xa kan nibij chi niben ri nich'ob, y man nich'utinirisaj ta iwi' chuwech ri Dios. Y ri banobel ri' kan itzel chuwech rija'.

¹⁷ Roma wi iwetaman achike ri utz, y xa man niben ta, yixmakun chuwech ri Dios.