Santiago 3 - Kaqchiquel Bible

Tichajij-iwi' rik'in ri ich'abel

¹ Wach'alal, man tirayij chi chi'iwonojel ta yixok tijonela'. Roma roj ri yojtijon, kan más k'iy ri xtuk'utuj ri Dios chiqe toq xtuq'et-tzij pa qawi'.

² Qonojel k'iy bey xa man ja ta ri yeqaben. Y wi ta k'o jun ri man jun bey nimakun rik'in ri ruch'abel, ri wineq ri' kan tz'aqet ri ruk'aslen. Roma wi nitikir nuq'et ri ruch'abel, kan nitikir chuqa' nuben keri' rik'in chijun ri ruch'akul.

³ Kan achi'el k'a nibanatej kik'in ri kiej toq niya'ox ch'ich' pa kichi' richin yeq'at. Roma xaxe rik'in ri ch'ich' ri', ri kiej nikinimaj tzij, y nikik'uaj ri kajaw akuchi nikajo' yebe-wi.

⁴ Achi'el chuqa' ri e nima'q taq barco ri e uk'uan roma kaq'iq' ri kan janila ruchuq'a'. Jak'a xaxe rik'in jun ti che' niban chike chi yebe akuchi nikajo-wi ri kajaw.

⁵ Achi'el jun ti q'aq', ri stape' yalan ko'ol ok nitikir nuk'is jun nimalej li'aj che'. Keri' chuqa' ri qaq', man nim ta, jak'a ri ch'abel ri nubij k'iy nitikir nuben.

⁶ Ri qaq' roj achi'el jun ruxaq-q'aq' ri tzijon rik'in ri q'aq' ri man jun bey nichup, ronojel ri nubij nuk'en-pe k'iy ruwech etzelal y nutz'ilobisaj chijun ri qach'akul.

⁷ Roj k'o quchuq'a' pa kiwi' ri aj-xik' chikopi', ri kumatzi', ri jalajoj kiwech ker y ri ch'aqa' chik chikopi'.

⁸ Jak'a ri qaq' man yojtikir ta niqaq'et, xa kan itzel-wi achi'el ri kamisanel ya' ri k'o pa kichi' ri kumatzi'.

⁹ K'o k'a bey niqaya' ruq'ij ri Dios rik'in ri qaq' y k'o bey xa niqakusaj richin niqabij itzel ch'abel chike ri winaqi', ri chuqa' e ruwachibel ri Dios.

¹⁰ Rik'in ri qaq' niqaya' ri urtisanik, y rik'in chuqa' ri' niqaya' ri etzelanik. Wach'alal, man ruk'amon ta chi keri' niqaben.

¹¹ Rix iwetaman chi chupan jun alaxibel-ya' man xtel ta pe utzilej ya' y chuqa' k'ayilej ya'.

¹² Jun che' richin wíkix, man xtuya' ta aceituna. Ni ri juwi-uva man xtuya' ta wíkix. Keri' chuqa' man xtel ta pe tzayilej ya' y utzilej ya' chupan jun alaxibel-ya'.

Ri etamabel ri nipe rik'in ri Dios

¹³ Wach'alal, wi ek'o chi'ikojol ri kan k'o kina'oj y k'o etamabel kik'in, kan ruk'amon chi nikik'ut chupan ri kik'aslen y rik'in ri utzilej taq kibanobal. Y re' k'o chi nuben rik'in qasanri'il.

¹⁴ Jak'a wi rix xa itzel nina' chire jun chik roma rija' utz k'o, y chuqa' niwajo' chi kan xaxe ta rix ri k'o utz nik'en kan chire ronojel, wi xa keri' niben, man k'a tibij chi k'o k'iy etamabel iwik'in, roma xa nitz'uk ri nibij.

¹⁵ Jun ch'obonik keri' man peteneq ta chila' chikaj rik'in ri Dios. Xa kan kichin ri winaqi' ri maneq Dios chikiwech, y xa richin chuqa' ri Itzel-Wineq.

¹⁶ Roma wi rix xa itzel nina' chire jun chik roma rija' utz k'o, y chuqa' niwajo' chi kan xaxe ta rix ri k'o utz nik'en kan chire ronojel, xa kan ix tz'ukuy-oyowal, y ix banoy ronojel ruwech etzelal.

¹⁷ Jak'a wi ja ri etamabel ri peteneq chila' chikaj rik'in ri Dios ri k'o iwik'in, re' nuben k'a chiwe chi nik'uaj jun k'aslen ch'ajch'oj, chi man niben ta oyowal, utz niben kik'in konojel, niwak'axaj jebel ri achike nikajo' ri winaqi' chiwe, y chi kan nijoyowaj kiwech konojel. Kan niben ronojel ri utz; man niben ta rukojol, ni man ka'i' ta ipalej chuqa'.

¹⁸ Ri winaqi' yetikir k'a yek'ase' choj toq k'o uxlanibel-k'u'x. Y ri nikitej kiq'ij chi nik'oje' uxlanibel-k'u'x xtikitz'et k'a chi ri winaqi' kan utz yek'oje'.