Wuj Richin Bix Chire ri Dios 97 - Kaqchiquel Bible

Ri Jehová jari' ri rey

¹ Ri Jehová niq'aton-tzij; kan kekikot k'a konojel winaqi' richin chijun ruwach'ulew. Konojel k'a winaqi' ri ek'o pa taq ruwach'ulew ri rusutin-kij chi ya', kan tikinimaq'ijuj k'a.

² Ri sutz' y ri q'equ'm kan kisutin k'a rij rija'. Ri q'atoj-tzij y ri ruchojmilal kan jari' ri ruxe' ri rajawaren.

³ Ri chuwech rija' kan ninabeyej k'a jun q'aq'. Ri q'aq' ri' kan yeruk'is k'a ri e etzelanel richin ri ek'o chunaqaj.

⁴ Ri koyopa' kan nusaqirisaj k'a ri ruwach'ulew. Y ri winaqi' kan nikitz'et k'a y nikik'en rukiy.

⁵ Ri nima'q taq juyu' kan yek'is-qa chuwech ri Jehová, achi'el nuben ri cera toq niya'er-qa. Kan yek'is-qa chuwech ri rajaw chijun ri ruwach'ulew.

⁶ Ri kaj kan nikiq'alajirisaj k'a ri ruchojmilal ri nuben rija'. Y konojel k'a tinamit nikitz'et ri ruk'ojlemal.

⁷ Chi'iwonojel rix ri ye'isamajij ri wachibel e toch'on, kan kixk'ixbitej k'a; keri' chuqa' rix ri yixkikot kik'in ri wachibel. Rix dios kichin ri ch'aqa' chik ruwach'ulew, kixxuke' richin niya' ruq'ij ri Jehová.

⁸ Nimalej Jehová, ri winaqi' aj-Sión kan yekikot k'a. Y konojel ri winaqi' richin Judá kan yekikot k'a rik'in ri ruchojmilal ri naya' rat,

⁹ roma rat Jehová kan at nim pa ruwi' chijun ruwach'ulew. Kan xaxe k'a rat ri ninimirisex aq'ij chikiwech ri ch'aqa' chik dios.

¹⁰ Ri ye'ajowan richin ri Jehová, kan tiketzelaj k'a ri itzel taq banobel, roma rija' kan yeruchajij ri e ralk'ual rija'. Kan yerukol pa kiq'a' ri e itzel taq winaqi'.

¹¹ Ri saqil kan yerusaqirisaj k'a ri choj kik'aslen. Y nuya' kikoten chike ri kan choj kánima.

¹² Kan kekikot k'a rik'in ri Jehová ri choj kik'aslen, y kan tikiya' ruq'ij ri Jehová roma ri nima'q taq samaj ri e rubanalon.