Wuj Richin Bix Chire ri Dios 96 - Kaqchiquel Bible

Ri Dios kan xaxe rija' ri rey

¹ Kan keqabixaj k'ak'a' taq bix chire ri Jehová. Tiqabixaj rubi' rija' qonojel winaqi' richin chijun ruwach'ulew.

² Tiqaya' ri qabix chire, y tiqanimirisaj ri rubi'. Kan q'ij-q'ij k'a tiqataluj rubixik ri kolotajik ri nuya' rija'.

³ Tiqach'abalij ri ruwaq'ijaj richin rija', chikikojol ri tzobaj winaqi' richin ri ruwach'ulew. Tiqatzijoj chupan ronojel tinamit ri nima'q taq banobel ri yeruben.

⁴ Roma ri Jehová kan janila nim, y kan ruk'amon richin niqanimirisaj ruq'ij. Kan xaxe wi rija' ri ruk'amon chi niqaya' ruq'ij chikiwech ri ch'aqa' chik dios.

⁵ Roma ri ki-dios ri ch'aqa' chik tinamit xa e wachibel. Jak'a ri Jehová kan ja rija' xbanon ri kaj.

⁶ Ri chuwech rija' kan xaxe k'a ruwaq'ijaj k'o. Uchuq'a' y k'ojlemal k'o pa rachoch.

⁷ Tiqak'ama-pe bix chire ri Jehová qonojel roj: Achijlonela', ixjayilonela' y alk'ualaxela' richin chijun ruwach'ulew. Kan tiqaya' k'a rejqalen ri ruk'ojlemal y ri ruchuq'a' ri Jehová.

⁸ Kan tiqaya' k'a ruq'ij achi'el ri ruk'amon chire rija'. Tiqak'amala-pe sipanik chuwa-jay chire ri rachoch rija'.

⁹ Tiqaqasaj-qi' chuwech ri Jehová chupan ri rachoch. Kan qonojel k'a ri ojk'o chuwech ri ruwach'ulew tik'oje' ruq'ij-ruk'ojlen ri Jehová chiqawech.

¹⁰ Tiqabij k'a chike ri winaqi' ri man nikitzeqelibej ta ri Jehová chi ja rija' ri niq'aton-tzij. Ja rija' ri xjikiban ri ruwach'ulew y kan man jun xtisilon richin. Kan ja rija' ri xtiq'aton-tzij pa qawi' rik'in ruchojmilal.

¹¹ Kan tikikot k'a ri kaj y ri ruwach'ulew. Tiwajin k'a ri palou y ronojel ri ek'o chupan.

¹² Kekikot k'a ri juyu' y ronojel ri ek'o chuwech. Ronojel ri liaj taq che' kan kejumum roma kikoten.

¹³ Ronojel k'a re' tiqabana' chuwech ri Jehová ri xtipe. Kan xtipe k'a richin noruq'ata-tzij pa ruwi' ri ruwach'ulew. Rik'in k'a ruchojmilal xtuq'et-tzij pa qawi' qonojel ri ojk'o chuwech re ruwach'ulew. Xtuq'et-tzij pa kiwi' ri tinamit rik'in ri ruch'abel rija'.