Wuj Richin Bix Chire ri Dios 95 - Kaqchiquel Bible

Tiqabixaj rubi' ri Dios rik'in kikoten

¹ Kixanpe, qojch'on rik'in kikoten chire ri Jehová. Rik'in kikoten qabixala' bix chire ri qatobal y qakolonel.

² Qojapon k'a chuwech rija' rik'in matioxinik. Kan tiqanimirisaj k'a ruq'ij rik'in kikoten.

³ Roma ri Jehová jari' ri nimalej Dios. Kan xaxe k'a rija' ri rey pa kiwi' ri ch'aqa' chik dios.

⁴ Roma kan pa ruq'a' rija' k'o-wi ri ruxe' ri ruwach'ulew. Ronojel ri nima'q taq juyu' chuqa' kan e richin rija'.

⁵ Ri palou kan e richin chuqa' rija', roma kan ja rija' ri xebanon. Kan ja rija' xbanon ri chaqi'j ruwach'ulew.

⁶ Kixanpe k'a, tiqaya' ruq'ij ri Jehová, y tiqaqasaj-qi' chuwech. Kan qojxuke' k'a chuwech ri Jehová ri xbanon qichin.

⁷ Roma kan ja rija' ri qa-Dios, y roj kan oj rutinamit k'a rija'. Kan oj achi'el rukarne'l richin ri ruqejoj y yojruchajij. Kan tiwak'axaj k'a wakami ri nuch'abel yin Jehová.

⁸ Man k'a tikowisiraj ri iwánima achi'el xbanatej ri ojer chiri' pa Meribá, achi'el ri chiri' pa Masá pa tz'iran ruwach'ulew.

⁹ Roma chiri' ri iwati't-imama' xinkitejtobej. Xinkitejtobej, stape' kan xkitz'et ri nima'q taq nubanobal.

¹⁰ Kawineq k'a juna' xq'axon ri wánima kik'in ri winaqi' ri'. Roma ri' yin kan xinbij k'a chi rije' chi chaq kaka' kik'u'x. Y xa man kitaqen ta k'a ri nupixa'.

¹¹ Roma ri' chupan ri woyowal xinya' nutzij, y xinbij chi rije' man xke'ok ta chupan ri ruwach'ulew ri xtikichinaj.