Wuj Richin Bix Chire ri Dios 94 - Kaqchiquel Bible

Ri Jehová jari' ri To'onel

¹ Nimalej Jehová, ri yaya'on rutojbalil ronojel ri mak, kan tak'utu' k'a awi' rat richin naya' rutojbalil-mak.

² Rat ri yachojmirisan ronojel ri nibanatej chuwech chijun ri ruwach'ulew. Kayakatej k'a y tataqa-pe ri awoyowal pa kiwi' ri kinimirisan-ki'.

³ Nimalej Jehová, ¿kan jantape' kami xkekikot ri winaqi' ri maneq awejqalen chikiwech? ¿K'a janipe' k'a ri'?

⁴ ¿K'a janipe' kami xketane' richin nikibila' poqon taq ch'abel? ¿Kan jantape' kami xtikinimirisaj-ki' re e banoy taq etzelal?

⁵ Re winaqi' re' kan janila k'a poqon nikiben chiqe roj ri oj atinamit rat. Kan yojkitz'ila' k'a roj ri xojacha' rat.

⁶ Kan yekikamisaj k'a ri malkani' y ri winaqi' man e qawinaq ta. Yekikamisaj k'a chuqa' ri meba'i' roma kan man yetikir ta nikito-ki'.

⁷ Ri itzel taq winaqi' nikibij-qa chi ronojel re' kan man xtatz'et ta rat. Nikibij chi rat xa kan man xtawak'axaj ta k'a.

⁸ Rix ri man jun iwetaman, kan tiq'ax k'a chiwech. Rix ri kan man jun ina'oj, ¿k'a janipe' k'a xkixok aj-na'oj?

⁹ Ri xbanon ri ak'axabel, ¿kan man nak'ex ta kami rija'? Ri xbanon ri wachaj, ¿kan man nitzu'un ta kami rija'?

¹⁰ Ri niya'on ri rutojbalil-mak pa kiwi' ri tinamit, ¿man nich'olin ta kami? ¿Kan man jun kami retaman ri nitijon richin jun wineq?

¹¹ Ri Jehová kan retaman k'a ri ich'obonik. Retaman chi ri ich'obonik xa man jun rejqalen.

¹² Jebel ruwa-ruq'ij ri wineq ri nachojmirisaj ri ruk'aslen rat Jehová, ri kan natijoj rik'in ri apixa' rat,

¹³ richin chi nuxlan chupan ri q'ij richin tijoj-poqonal, rokik ri e banoy etzelal kan nik'ot jul richin yemuq.

¹⁴ Rat Jehová kan man xqojamalij ta k'a kan roj ri oj atinamit. Kan man xqojamalaba' ta kan roj ri xojacha' richin xojok awichin.

¹⁵ Rat kan xtaben k'a chi ri ruchojmilal xtapon chik chupan ri q'atbel-tzij. Kan jari' ri xtikikanoj ri winaqi' choj kik'aslen.

¹⁶ ¿Achike k'a xkito'on yin chikiwech ri e banoy etzelal? ¿Achike k'a xtito'on wichin chikiwech ri itzel taq winaqi'?

¹⁷ Wi rat Jehová man ta xinato', yin xa kan xiken yan ta ri'.

¹⁸ Toq yin xa kan yijilijo' yan, y xich'on awik'in, jari' k'a toq rat Jehová xinato' chi'anin rik'in ri awajowabal ri man k'isel ta.

¹⁹ Toq yin janila yiququt roma ri ruk'ayewal ri ninq'axaj, jari' toq rat Jehová nakuquba' nuk'u'x y naya' kikoten pa wánima.

²⁰ Rat kan man yeqa' ta k'a chawech ri man pa ruchojmilal ta yeq'aton-tzij. Ri kan nikiq'ej ruwi' ri pixa' xaxe richin man nikiq'et ta tzij pa ruchojmilal.

²¹ Ri winaqi' ri' xa kan nikimol k'a ki' richin nikelesaj ri ruk'aslen ri utzilej wineq. Nikiben k'a chire ri maneq rumak, chi nutoj rumak.

²² Jak'a yin kan ja rat Jehová ri at nutobal. Ja rat ri at nu-Dios richin ri nukolotajik.

²³ Rat Jehová kan xtaben k'a chi ri kimak ri e banoy taq etzelal kan xtikejqalej rije'. Kan xke'ak'is k'a chupan ri kimak. Kan jak'a rat Jehová ri at qa-Dios ri xkabanon keri' chike ri winaqi' ri'.