Wuj Richin Bix Chire ri Dios 93 - Kaqchiquel Bible

Ri Jehová jari' ri rey

¹ Ri Jehová jari' ri rey y xuwiq k'a ri' rik'in ruwaq'ijaj. Rija' kan k'o ruchuq'a' y xuch'okoba' k'a jebel ri ruwach'ulew, xuben chire chi man nisilon ta ri akuchi k'o-wi.

² Ri atz'uyubal rat Jehová kan ach'okoban-pe ojer ri', y kan man jun nisilon. Kan ja rat ri at Dios richin tibe-q'ij tibe-seq.

³ Nimalej Jehová, ri raqen taq ya' kan yewajin k'a; kan yewajin k'a roma kan janila e nima'q.

⁴ Jehová ri atk'o chila' chikaj ri kan k'o ronojel uchuq'a' pan aq'a'. Ri awuchuq'a' kan nik'o chuwech ri ruchuq'a' ri palou. Kan nik'o k'a chuwech ri ya' ri nibolqo't pa ruwi'.

⁵ Nimalej Jehová, ri apixa' rat kan jari' k'a ri choj. Ri ruch'ajch'ojil kan jari' ri ruk'amon chire ri awachoch. Kan keri' k'a nimalej Jehová, tibe-q'ij tibe-seq.