Wuj Richin Bix Chire ri Dios 92 - Kaqchiquel Bible

Bix roma ri rutzil ri Dios*f94*

¹ Nimalej Jehová, kan janila k'a jebel ri niya'ox aq'ij rat. Ri nibixex ri nimalej abi' kan janila jebel.

² Ri pa taq nimaq'a' kan xtitalux k'a rutzijol ri awutzil rat. Y ri pa taq tokoq'a', xtinatex k'a chi rat kan naben ri asujun.

³ Re' kan xtibixex k'a rik'in jalajoj kiwech q'ojom.

⁴ Ronojel re' ninben roma rat nimalej Jehová kan aya'on ri nukikoten. Kan yikikot k'a rik'in ronojel ri abanon.

⁵ Nimalej Jehová ri samaj ri e abanon rat kan janila k'a e nima'q. Ri ach'obonik rat kan janila k'a e nima'q.

⁶ Ri wineq ri man jun retaman, man niq'ax ta k'a chuwech ronojel re'.

⁷ Wi ri e banoy etzelal yek'iy achi'el ri q'ayis, y utz nikiben-q'anej, xaxe richin yek'is jumul.

⁸ Jak'a rat Jehová kan jantape' k'a nimalej aq'ij.

⁹ Nimalej Jehová, ri e etzelanel awichin xa kan xkek'is k'a jumul. Xa kan xketalutej k'a el jumul ri e banoy taq etzelal.

¹⁰ Jak'a yin kan xtaya' más wuchuq'a', achi'el ri ruchuq'a' ri juyubel bóyix. Xtaqasaj k'a aceite pa nuwi', retal richin kikoten.

¹¹ Yin kan xintz'et k'a ri xkik'uluwachij ri e etzelanel wichin. Kan xinwak'axaj k'a toq yesik'in ri e yakatajineq chuwij.

¹² Ri winaqi' ri choj kik'aslen, kan utz k'a xtel chikiwech ronojel ri nikiben, xkek'iy k'a achi'el ri palma, y achi'el ri tiox-che' ri k'o pa Líbano.

¹³ Rije' kan xkebe k'a pa jotol achi'el ri che' ri e tikil chuwa-rachoch ri Jehová, achi'el ri che' ri yesijan chuwa-jay chire ri rachoch.

¹⁴ Stape' kan k'o chik kijuna', kan utz nel chikiwech ronojel. Kan jantape' k'a k'o kuchuq'a' y jebel yetzu'un.

¹⁵ Y keri' nitalutej ri utzilej rutzijol, chi ri Jehová ri nutobal kan choj-wi, y chi rik'in rija' kan xaxe ri ruchojmilal k'o.