Wuj Richin Bix Chire ri Dios 91 - Kaqchiquel Bible

Ri Dios jari' ri qatobal roj

¹ Ri nikito-ki' rik'in ri nimalej rutzil ri Dios, kan kuqul k'a kik'u'x yek'oje' chuxe' ri rumujal rija'.

² Yin kan ninbij k'a chire ri Jehová, chi ja rija' ri nutobal. Rija' kan achi'el jun jay ri sutin-rij chi tz'aq ri akuchi ninto-wi-wi'. Ja rija' nu-Dios ri kan nukuquban nuk'u'x rik'in.

³ Ja rija' xtijech'en qichin chuwech ri pikbel ri nuya' ri kamisanel. Xqojrukol chuwech ri nima-yabil ri kan yojruk'is.

⁴ Xqojrukuch k'a rik'in ri ruxik'. Chuxe' ri' kan kuqul qak'u'x xqojk'oje'. Rija' xqojruto' y man xqojrumalij ta kan.

⁵ Man xtiqaxibij ta qi' chuwech ri q'equ'm richin ri chi'aq'a'. Man xtiqaxibij ta qi' chire ri ch'ab ri yek'aqalox ri paq'ij.

⁶ Ni man xtiqaxibij ta qi' chire ri nima-yabil ri nuk'en-pe ri q'equ'm, ni chire ri kamik ri kan chuwa-saqil yebanatej.

⁷ Stape' chiqanaqaj yekamisex ta e 1,000 winaqi', y ek'o ta chik e 10,000 ri yekamisex kan pa qijkiq'a', jak'a roj kan man jun k'a xtiqak'uluwachij.

⁸ Ronojel re' kan xtiqatz'et k'a roj rik'in ri runaq' taq qawech. Kan xtiqatz'et k'a ri xtikik'ul ri maneq Dios chikiwech.

⁹ Jak'a roj man jun xtiqak'uluwachij roma qakuquban qak'u'x rik'in ri Jehová. Roj kan rik'in k'a rija' niqato-wi-qi'.

¹⁰ Roma ri' kan man jun k'a ruk'ayewal xtipe chiqij. Man jun k'a nima-yabil ri xtapon pa qachoch.

¹¹ Ri Dios kan xkeruteq k'a pe ri ru-ángel chiqanaqaj. Xqojkichajij k'a chijun qak'aslen.

¹² Xqojkili'ej k'a pa kiq'a'. Keri' roj man xtiqapajk'ij ta ri qaqen.

¹³ Xqojbiyaj k'a chikikojol ri koj y ri kumetz. Stape' xqojq'ax pa kiwi' alaji' taq koj y pa kiwi' itzel taq kumatzi' ri kan yekamisan, man jun xtiqak'uluwachij.

¹⁴ Ri Jehová nubij: Roma kan wik'in yin rukuquban-wi ruk'u'x, yin kan xtinkol. Kan xtinya' pa jotol, roma kan ruya'on rejqalen ri nubi'.

¹⁵ Rija' k'o xtuk'utuj chuwe, y yin xtink'uluba-pe ri ruch'abel. Kan xkik'oje' rik'in pa bis, Xtinkol k'a y xtinnimirisaj ruq'ij.

¹⁶ Xtinya' k'a k'iy q'ij ruk'aslen chuwech re ruwach'ulew. Y kan xtink'ut k'a chuwech ri kolotajik ri ninya'.