Wuj Richin Bix Chire ri Dios 90 - Kaqchiquel Bible

Ri Dios kan richin q'asen y ri wineq xa q'axel*f93*

¹ Ajaw, kan ja rat ri at qatobal, keri' jantape' oj peteneq ri chi wiq chi tanaj.

² Kan ja toq k'a man jani kebek'ulun-pe ri nima'q taq juyu', toq k'a man jani taben ri ruwach'ulew y ronojel ri k'o chuwech, kan jampe' ri q'ij peteneq, tibe-q'ij tibe-seq, kan xaxe wi rat ri at Dios.

³ Rat kan naben chiqe chi yojok chik ulew. Kan yojawoyoj-wi richin yojok chik poqolaj.

⁴ Chawech rat ri 1,000 juna', xa kan man jun ok. Xa kan achi'el ok ri jun q'ij iwir ri xa xq'ax yan kan, achi'el jun ti ramaj chire ri chi'aq'a'.

^5-6 Kan yojak'uaj k'a el, achi'el nuben ri raqen-ya'. Ri qak'aslen man niyaloj ta, xa achi'el ok jun achik'. Achi'el jun q'ayis ri nik'iy-pe ri nimaq'a'; y nisijan-pe. Jak'a ri tiqaq'ij xa nich'up-qa y xa nichaqi'j-qa. Keri' ri qak'aslen roj.

⁷ Rik'in ri awoyowal yojak'is. Roj kan nisach qak'u'x toq rat niyakatej awoyowal.

⁸ Ri qamak kan ronojel k'a natz'et-pe. Ri itzel taq qabanobal, kan ronojel k'a tik'il chawech rat.

⁹ Ri q'ij chire ri qak'aslen xa kan beneq pa xulan roma rat nipe awoyowal chiqe. Ronojel juna' ri niqaq'axaj, xa achi'el ok jun ch'obonik.

¹⁰ Ri qak'aslen chuwech re ruwach'ulew, kan xaxe k'a oxk'al lajuj juna'. Jak'a wi ek'o ri k'o más kuchuq'a', ye'apon k'a pa jumuch' kijuna'. Man rik'in ri', xa kan xaxe q'axo'n y ruk'ayewal ruk'amon-pe Ri qak'aslen xa kan chi'anin k'a niq'ax y xqojbe.

¹¹ ¿Achike ta k'a wineq ri retaman ri retabal ri awoyowal rat, ri awoyowal ri kan ruk'amon chi niqak'en rukiy?

¹² Tabana' utzil Jehová, tak'utu' chiqawech ri rubanik richin yojk'ase', richin keri' kan ta nipe pa qánima ri na'oj.

¹³ ¿K'a janipe' k'a xkape chik Jehová richin no'aya' chik ri awutzil pa qawi'? Tabana' utzil tik'o-qa ri awoyowal chiqij roj ri oj asamajela'.

¹⁴ Taya' ri awajowabal chiqe ronojel nimaq'a', richin roj xqojbixan y xqojkikot ta ronojel q'ij chire ri qak'aslen.

¹⁵ Taya' k'iy q'ij richin kikoten chiqe, achi'el ri rajlabal ri q'ij ri xqaq'axaj pa tijoj-poqonal, achi'el rajlabal ri juna' ri kan xaxe ri ruk'ayewal ri xqatz'et.

¹⁶ Xtiq'alajin ta chik pe ri meyel taq abanobal qik'in roj ri oj asamajela'. Ri ak'ojlemal rat kan ta xtiq'alajin-pe pa kiwi' ri qijatzul.

¹⁷ Jehová ri at qa-Dios roj, ri asaqil rat ja ta ri' ri xtisaqirisan pa qawi' roj. Ronojel ri samaj ri yeqaben roj kan ta xtawurtisaj-pe. Kan keri', ri samaj ri yeqaben kan ta xtiqa' chawech rat Jehová.