Wuj Richin Bix Chire ri Dios 89 - Kaqchiquel Bible

Ri jikibel-tzij ri rubanon ri Dios rik'in ri David*f91*

¹ Kan jantape' k'a xtinbixaj ri awutzil rat Jehová. Kan xtintzijoj chike ri chi wiq chi tanaj winaqi', chi man oj amalin ta kan.

² Xtintaluj k'a rubixik chi ri awajowabal rat kan richin q'asen, ri nabij rat chi naben, kan man xtijalatej ta. Kan man nujel ta ri', achi'el ri kaj ri kan ja ruwech jantape'.

³ Rat Jehová kan xaben k'a jun jikibel-tzij rik'in ri asamajel ri acha'on. Xaya' k'a atzij chire ri David ri asamajel.

⁴ Xabij chi kan richin k'a q'asen xajikiba' ri rijatzul. y ri rajawaren kan jantape' k'a xtibe pa jotol.

⁵ Nimalej Jehová, chila' chikaj nak'axatej nimaq'ij roma ri nima'q taq banobel ri ye'aben rat. Ri aj-chikajil kan nikiya' aq'ij roma kan naben ri asujun.

⁶ Man jun k'o chila' chikaj ri achi'el rat. Man jun ri k'o chila' awik'in ri junan ta awik'in rat.

⁷ Rat kan k'o-wi aq'ij-ak'ojlen chikiwech ri ek'o awik'in. Konojel janila nikixibij-ki' chawech.

⁸ Nimalej Jehová, Dios k'iytisanel richin ronojel, ¿achike ta chik k'a jun ri achi'el rat? Rat kan k'o ronojel uchuq'a' pan aq'a'. Ronojel ri asujun, kan abanon.

⁹ Rat kan naq'et k'a ri royowal ri palou toq nibolqo't-pe ruwi', rat kan naben k'a chire chi nisiliso-qa.

¹⁰ Rat kan xach'akon chirij ri chikop Rahab,*f92* y xaben chi xken. Rik'in ri nimalej awuchuq'a', xe'ach'ek y xe'ataluj ri e etzelanel awichin.

¹¹ Kan awichin k'a rat ri kaj y ri ruwach'ulew. Chijun ri ruwach'ulew y ronojel ri k'o chuwech, ja rat xabanon,

¹² nitiker-pe pa xaman y napon k'a pa xokon. Ri juyu' Tabor y ri Hermón kan yebixan rik'in kikoten richin nikiya' aq'ij.

¹³ Ri aq'a' rat kan k'o-wi ruchuq'a'. Y rat kan at ch'akonel.

¹⁴ Rat kan jantape' k'a naq'et-tzij pa ruchojmilal y jantape' naben ri nabij, ri awajowabal kan nitz'etetej.

¹⁵ Jebel ruwa-kiq'ij ri nikiya' aq'ij rik'in bix, kan yebiyin k'a rik'in ri awutzil.

¹⁶ Awoma rat yekikot chijun q'ij. Kan nikinimirisaj k'a ri aq'ij roma rat kan at choj kik'in.

¹⁷ Rat naya' kuchuq'a' y naben chike chi yekich'ek ri e etzelanel kichin.

¹⁸ Kan ja rat Jehová ri at qatobal. Ja rat loq'olej Dios ri at qa-rey.

¹⁹ K'o k'a jun q'ij toq rat Jehová xach'on qik'in pa jun achi'el achik'. Xabij k'a chiqe: Yin xinya' k'a ruchuq'a' jun nimalej achin richin oyowal. Kan xinsuj yan k'a ri ajawaren chire ri nucha'on chi'ikojol rix.

²⁰ Ri achin ri' kan ja ri David ri nusamajel. Ja yin xicha'on richin y xinqasaj aceite pa ruwi' richin xok rey.

²¹ Kan jantape' k'a xkik'oje' rik'in. Ri ruchuq'a' kan man jun bey k'a xtik'is, roma kan xtinya' ri nuq'a' pa ruwi'.

²² Ri e etzelanel richin, kan man xketikir ta k'a chirij. Kan man xtich'akatej ta k'a koma ri e banoy taq etzelal.

²³ Yin Jehová xa kan xkenwulaj k'a el chuwech rija' ri e etzelanel richin. Kan xkenk'is-el konojel ri nich'upun kik'u'x chirij.

²⁴ Man jun bey k'a xtinmalij kan, ri wajowabal pa ruwi' rija' man jun bey xtik'is. Pa nubi' yin xtibe pa jotol ri ruchuq'a' rija'.

²⁵ Ri ruchuq'a' ri rajawaren rija' nitiker k'a el rik'in ri palou, napon k'a rik'in ri raqen-ya' Éufrates.

²⁶ Rija' kan xtubij k'a chuwe chi yin in rutata', chi yin in ru-Dios, in rutobal y chuqa' in rukolonel.

²⁷ Yin kan xtinben chire chi xtok achi'el jun nabey ak'ual. Kan ja rija' ri más nim pa kiwi' konojel ri rey richin chijun ri ruwach'ulew.

²⁸ Ri wutzil kan jantape' k'a xtik'oje' pa ruwi'. Ri nujikibel-tzij kan jantape' k'a xtijike' rik'in rija'.

²⁹ Jantape' xtik'oje' jun rijatzul chupan ri rajawaren. Y ri rajawaren kan xtinjikiba' pa ruq'a' tibe-q'ij tibe-seq.

³⁰ Jak'a wi ri rijatzul xa xtikimalij kan ri nupixa'; man xkebiyin ta chupan ri ruchojmilal ri ninya' yin;

³¹ xa xtikixolq'otij ruwi' ri nubin chike; y man xtikitaqej ta ri pixa';

³² wi keri', yin Jehová kan xkenxik'ayuj roma ri kimak. Kan xkenjich' k'a roma ri itzel taq kibanobal.

³³ Man rik'in ri' yin man xtinwelesaj ta ri wutzil pa ruwi' ri David. Kan man xtinjel ta k'a ri nuch'abel ri nubin chire.

³⁴ Yin kan xtinben-wi ri nujikibel-tzij ri nubanon rik'in. Kan xtinben ronojel ri nubin.

³⁵ Kan xinjikiba' k'a richin q'asen, kan man xtinq'ol ta k'a ri David.

³⁶ Ri rijatzul kan xtiq'aton-tzij richin q'asen. Ri rajawaren kan xtiyaloj k'a achi'el ri q'ij;

³⁷ kan achi'el ri ik' ri jantape' k'o; keri' xtik'oje' rokik k'o ri kaj, xacha' rat Jehová.

³⁸ Jak'a rat Jehová xa xpe awoyowal chire ri rey ri acha'on. Xawetzelaj k'a y xamalij kan.

³⁹ Xaq'ej k'a ruwi' ri jikibel-tzij ri abanon rik'in. Kan xawelesaj ri retal ri rusamaj, y xaya' ruk'ix.

⁴⁰ Xawulaj k'a el ri tz'aq ri rusutin-rij ri rutinamit. Ri tz'aq ri akuchi yek'oje-wi ri chajinela' kan xaben chi xek'is-el.

⁴¹ Konojel ri winaqi' ri yeq'ax-el chiri' kan ye'eleq'-el chupan. Ri winaqi' ri ek'o chunaqaj kan yetze'en k'a chirij.

⁴² Kan xaya' k'a ri ch'akonik pa kiq'a' ri e etzelanel richin. Xaya' k'a q'ij chi xekikot chirij ri David.

⁴³ Pa ruwi' ri' kan man xato' ta chik toq nibe pan oyowal. Xaben chire chi xch'akatej.

⁴⁴ Kan xawelesaj k'a retal ri rusamaj, ri ruk'ojlemal kan xaben chi xk'is.

⁴⁵ Xaben chire chi chi'anin xrijix y wakami xa kan xaya' ruk'ix.

Ri David nuk'utuj to'onik

⁴⁶ Nimalej Jehová, ¿kan jantape' kami xtawewaj-awi'? ¿Jantape' kami xtik'a'on ri awoyowal achi'el nuben ri q'aq'?

⁴⁷ Toqaqa chi'ak'u'x chi ri qak'aslen xa ti juba' ok, xa k'o chi yojken.

⁴⁸ ¿Achike ta k'a wineq ri nik'ase' y man nutz'et ta el ri kamik? ¿Achike ta k'a ri nikolotej chuwech ri jul muqbel kamineq?

⁴⁹ Ajaw, ¿akuchi k'a k'o-wi ri awajowabal ri man k'isel ta ri aya'on-pe pa qawi' ojer? ¿Akuchi k'o-wi ri jikibel-tzij ri xaben wik'in yin David?

⁵⁰ Tatz'eta' chi yin kan jantape' niya'ox nuk'ix. Ronojel re ch'abel re' kan kiya'on q'axo'n pa wánima.

⁵¹ Nimalej Jehová, ri e etzelanel awichin kan nikiqasaj nuq'ij yin ri in acha'on. Xabakuchi k'a in beneq-wi, kan yetze'en chuwij.

⁵² ¡Kan nimalej k'a aq'ij rat Jehová, tibe-q'ij tibe-seq! Kan keri' wi, ja' kan keri'.