Wuj Richin Bix Chire ri Dios 84 - Kaqchiquel Bible

Rayibel pa ruwi' ri rachoch ri Dios*f84*

¹ ¡Jehová k'iytisanel richin ronojel, ri awachoch kan janila jebel!

² Ri wánima kan nurayibej chi nik'oje' ta pa ruwa-jay chire ri awachoch. Rik'in ronojel wánima, ninya' aq'ij rat k'aslik Dios. Ninbixaj rik'in kikoten.

³ Chupan ri tz'aq richin ri awachoch rat Jehová nu-Dios yin, kan jajun ri ti tz'unun y ri ti buqul-sib nikiben kisok chiri'. Rije' yekichajij ri taq kal chunaqaj ri aporobal, Jehová k'iytisanel richin ronojel.

⁴ Jebel ruwa-kiq'ij ri ek'o pan awachoch, ri kan jantape' nikiya' aq'ij.

⁵ Jebel ruwa-kiq'ij ri kan nikil kuchuq'a' awik'in rat, roma kan rik'in ronojel kánima yebe pa juyu' Sión.

⁶ Stape' ri bey niq'ax chupan ri taq'aj richin Oq'ej,*f85* akuchi janila chaqi'j, jak'a rat kan naben chi yetz'ukutej-pe ralaxbel taq ya' chiri'. Chuqa' nateq-pe pa ruwi', ri nabey taq job pa ruk'iyal.

⁷ Y ri kuchuq'a' kan nik'iyer rokik yeq'ax chupan ri bey ri'. Y pa ruk'isibel chire ri kibinen, yatkitz'et rat chiri' pa juyu' Sión.

⁸ Jehová Dios k'iytisanel richin ronojel, tabana' utzil tawak'axaj ri nuch'owen. Kinawak'axaj k'a nimalej qa-Dios roj israelita.

⁹ Tabana' utzil tatzu' rat ri at qatobal, taya' urtisanik pa ruwi' ri qa-rey.

¹⁰ Kan más k'a rejqalen ri jun q'ij ri yik'oje' chupan ri awachoch, ke chuwech yik'oje' 1,000 q'ij juk'an chik. Más utz chi stape' xa chuchi-ok ri awachoch yipa'e-wi, ke chuwech yik'ase' pa rachoch jun wineq ri banoy etzelal.

¹¹ Roma rat Jehová Dios, kan ja rat yasaqirisan ri qabey, y yojachajij; kan naya' ri utzil y ruwaq'ijaj chike ri yebiyin choj chawech rat, y kan man nawelesaj ta k'a ri awutzil pa kiwi'.

¹² Jehová k'iytisanel richin ronojel, jebel ruwa-kiq'ij ri winaqi' ri kikuquban kik'u'x awik'in.