Wuj Richin Bix Chire ri Dios 82 - Kaqchiquel Bible

Ri Dios niq'aton-tzij pa ruchojmilal*f82*

¹ Ri Dios kan k'o-wi chikikojol ri to'onela' ri yeq'aton-tzij Kan chikikojol k'a ri ch'aqa' chik dios nuq'et-wi tzij.

² Y nubij k'a: ¿K'a janipe' k'a yixtane' richin man pa ruchojmilal ta niq'et-tzij, y kan chaq ye'ito' ri e banoy taq etzelal?

³ Kan ke'ito' k'a ri maneq kuchuq'a' y ri meba'i'. Tibana' ri ruchojmilal rik'in ri poqonatajineq, y rik'in ri kan k'o nik'atzin chike.

⁴ Ke'ikolo' ri maneq kuchuq'a', keri' chuqa' ri man jun k'o kik'in. Ke'ikolo' k'a pa kiq'a' ri e banoy taq etzelal.

⁵ Rix xa man jun iwetaman y xa man jun niq'ax chiwech, xa kan pa q'equ'm k'a ix beneq-wi; roma ri itzel taq ibanobal rix, kan nisilon k'a ri ruxe' ri ruwach'ulew.

⁶ Yin nubin k'a chi chi'iwonojel rix ix dios chuqa'; chi'iwonojel rix kan ix walk'ual.

⁷ Jak'a xa kan xkixken achi'el yeken konojel winaqi', xa kan yixtzaq achi'el jun xabachike aj-raqen, keri' nubin.

⁸ Roma ronojel re', nimalej Dios, kan kayakatej k'a richin naq'et-tzij pa ruwi' chijun ri ruwach'ulew. Taq'ata-tzij pa ruwi' roma kan ja rat ri at rajaw.