Wuj Richin Bix Chire ri Dios 80 - Kaqchiquel Bible

Jun k'utunik richin rutzil ri Dios*f79*

¹ Tawak'axaj ri qach'owen, rat nimalej Jehová ri yachajin ri tinamit Israel. Qojachajij k'a, achi'el nuben jun yuq'unel kik'in ri taq rukarne'l. Rat ri atk'o pa kiwi' ri kiwachibel ri querubín,*f80*

² Tak'utu' ri awuchuq'a' chikiwech ri aj-Efraín, ri aj-Benjamín y ri aj-Manasés, katanpe richin yojakol.

³ Nimalej Dios tabana' utzil, tabana' chik qik'in achi'el ri abanon-pe. Taya' ri awutzil pa qawi', y qojakolo'.

⁴ Jehová, Dios k'iytisanel richin ronojel, ¿K'a janipe' k'a nik'o-qa ri awoyowal chirij ri qach'owen?

⁵ Xaben chiqe chi ri qoq'ej achi'el xa ta jari' ri qaway, ri ruya'al runaq' taq qawech achi'el xa ta qaya' ri niqaqum pa ruk'iyal.

⁶ Xaya' q'ij chi yojkiyojobej ri winaqi' ri ek'o chiqanaqaj, ri e etzelanel qichin kan yetze'en chiqij.

⁷ Nimalej Dios k'iytisanel richin ronojel, tabana' utzil tabana' chik qik'in achi'el ri abanon-pe. Taya' ri awutzil pa qawi' richin yojakol.

⁸ Rat xe'awelesaj-pe ri qati't-qamama' pan Egipto y xe'ak'en-pe wawe'; K'ari' xe'awelesaj-el ri winaqi' ri kan ek'o wawe', richin xe'ajikiba' kan.

⁹ Xachojmirisaj ri akuchi xek'oje-wi, y xe'ajikiba' jebel; rije' kan xek'iyer k'a chuwech ri ruwach'ulew k'a re wakami.

¹⁰ Y keri' kan xkinojisaj-q'anej ruwech chijun ri ruwach'ulew, y xe'apon k'a akuchi e tikil-wi ri tiox-che' ri ek'o pa Líbano.

¹¹ Ek'o chuqa' xebek'oje' k'a chuchi' ri palou, y xe'apon k'a chuchi' ri raqen-ya' Éufrates.

¹² ¿Achike roma xaya' q'ij chi ri e etzelanel qichin xe'ok-pe, y wakami xa nuk'uex-el ronojel ri k'o qik'in?

¹³ Rije' xa e achi'el juyubel aq ri xa nikikich rupan ri qaruwach'ulew; e achi'el ri k'uxunela' taq chikopi' ri xa xe'ok chupan richin xkik'is-el ronojel.

¹⁴ Nimalej Dios k'iytisanel richin ronojel, katzolej chik k'a pe wakami. Katzu'un k'a pe chila' chikaj richin tach'obo' rij, y katanpe richin yojakol.

¹⁵ Katanpe richin yojakol roj ri kan oj achi'el tiko'n ri ja rat xatiko-qa, ri kan xajikiba' chi kan awichin rat.

¹⁶ Ri qaruwach'ulew xa kan xya'ox k'a ruq'aq'al, y tolan chik rubanon, roma ri' rik'in ri awoyowal ke'ak'isa' ri winaqi' ri xeya'on ruq'aq'al.

¹⁷ Jak'a kan taya' ri awutzil pa qawi' roj, roj ri xojajikiba' rik'in ri awijkiq'a', roma ja rat xatikeriban-q'anej qichin.

¹⁸ Roj kan man xtiqach'er ta chik kan qi' awik'in rat; taya' chik qak'aslen, y roj kan jantape' xqojch'on awik'in.

¹⁹ Nimalej Dios tabana' utzil, tabana' chik qik'in achi'el ri abanon-pe. Taya' ri awutzil pa qawi', y qojakolo'.