Wuj Richin Bix Chire ri Dios 8 - Kaqchiquel Bible

Ri ruk'ojlemal ri Dios y ri rejqalen ri wineq*f6*

¹ Jehová qajaw roj, ¡kan janila k'a nim ri abi' chuwech chijun ri ruwach'ulew! Ri ak'ojlemal kan k'a pa ruwi' ri kaj niq'alajin-wi chuqa'.

² Kan jajun ri taq ak'uala' y ri k'a yetz'uman na, nikibixaj ri nimalej abi', chikiwech ri e etzelanel awichin; keri' nikiben richin ketane-qa ri e yakatajineq chawij.

³ Toq nintz'et ri kaj, ri kan ja ri aq'a' rat banayon; ri ik' y ri ch'umila' ri kan ja rat ri xabanon kichin,

⁴ jari' toq ninch'ob-qa, ¿Achike ta k'a ok ri wineq richin chi naquqa-pe rij y richin chi nachajij?

⁵ Man rik'in ri' abanon chire chi k'o ruq'ij y rejqalen, xaxe kan qajineq juba' chawech rat.

⁶ Xaben chire ri wineq chi xok q'atoy-tzij pa ruwi' ronojel ri xaben. Ronojel k'a re xaben xaya' pa ruq'a':

⁷ Ri kokoj y ri nima'q taq qawej, konojel k'a ri chikopi' ri e richin k'echelaj,

⁸ ri aj-xik' taq chikopi', ri ker ri ek'o chupan ri palou y ri jalajoj kiwech chikopi' ri yek'oje' pa ya'.

⁹ Nimalej Jehová, qajaw roj, kan janila k'a nim ri ak'ojlen. Kan janila nim ruk'ojlen ri abi' chuwech chijun ruwach'ulew.