Wuj Richin Bix Chire ri Dios 78 - Kaqchiquel Bible

Ri rutzil ri Dios pa ruwi' ri rutinamit*f76*

¹ Nutinamit yin, tiwak'axaj k'a ri nutijonik, kan tiya' k'a ixikin chire ri nuch'abel.

² Kan xkich'on k'a rik'in etamabel-tzij, xtinq'alajirisaj ri kan e ewatel-pe ojer.

³ Re' kan qak'axan k'a y kan q'axineq chiqawech, y kan ja ri qati't-qamama' ri e tzijoyon kan chiqe.

⁴ Man xtiqewaj ta k'a chikiwech ri qalk'ual xa kan xtiqatzijoj chike ri sol winaqi' ri e peteneq, ronojel ri xuben ri Jehová y ri nimalej ruchuq'a', keri' chuqa' ri meyel taq banobel ri xuben kik'in.

⁵ Rija' xuya' pixa' chiqe roj ri oj rijatzul kan ri Jacob. Ri rupixa' kan xuya' k'a chiqe roj qonojel. Y xubij k'a chike ri qate-qatata' chi tikik'utu' chikiwech ri kalk'ual,

⁶ richin chi ri sol winaqi' ri xkepe, niketamaj, y xtikitzijoj chik chike ri kalk'ual rije'. Y ri kalk'ual chik re winaqi' re' kan xtikitzijoj chik chike ri kalk'ual rije'.

⁷ Ronojel re' nik'atzin richin chi rik'in ri Dios tikikuquba-wi kik'u'x, y richin chi man tikimestaj ronojel ri meyel taq banobel ri xuben kik'in, y kan tikiyaka' ri pixa' ri xuya' chike.

⁸ Richin keri' man tikiben achi'el ri xkiben ri kite-kitata' rije', ri xa kan xaxe ri yakatajinenri'il ri xkiben y man ja ta ri xubij ri Dios chike. Rije' xa kan man xkijeq ta ri kánima chuwech ri Dios ni man xkiben ta ri xkisuj chire ri Dios.

⁹ Ri tzobaj richin ri Efraín, kan e aj-ch'ab-wi, jak'a xa xe'animej-pe chupan ri q'ij richin oyowal.

¹⁰ Kan man xkiyek ta k'a pa kánima ri jikibel-tzij ri xuben ri Dios kik'in. Y man xkajo' ta k'a xebiyin achi'el ri nubij ri rupixa'.

¹¹ Xa kan xkimestaj k'a ronojel ri xuben kik'in. Xkimestaj ri meyel taq banobel ri xuk'ut chikiwech.

¹² Re meyel taq banobel re' kan xuben k'a chikiwech ri ojer qati't-qamama' chupan k'a ri ruwach'ulew Egipto, ri chiri' pa tinamit Soan.

¹³ Ri Dios kan xuch'er k'a ri palou y xeruq'axaj chupan. Xuq'et k'a ri ya', y kan achi'el tz'aq xuben chire.

¹⁴ Ri paq'ij xeruyuqej rik'in jun sutz' pa'el chikaj. Y ri chi'aq'a' rik'in jun ruxaq-q'aq' pa'el chikaj.

¹⁵ Xupaxij k'a ri abej pa tz'iran ruwach'ulew, y xuya' k'a kiya' pa ruk'iyal, richin xkiqum konojel.

¹⁶ Kan chupan k'a ri abej xbebiyin-wi-pe ri ya', y ri ya' ri' kan achi'el k'a raqen taq ya' xuben chike.

¹⁷ Man rik'in ri' kan xemakun chik k'a, kan xeyakatej k'a chirij ri nimalej Dios chiri' pa tz'iran ruwach'ulew.

¹⁸ Jantape' k'a xkitejtobej ri Dios, richin xkik'utuj q'utun ri xkajo' rije'.

¹⁹ Xech'on chirij ri Dios y xkibij: ¿Nitikir kami ri Dios nuya' qaq'utun wawe' pa tz'iran ruwach'ulew?

²⁰ qitzij wi chi rija' xupaxij ri abej; chi xuben chi xbebulbu'x-pe ya' y xmu'e' ri ruwach'ulew rik'in ri ya' ri'. Jak'a ¿kan nitikir kami nuya' chuqa' qaway? ¿Kan nitikir kami nuya' ti'ij chiqe roj ri oj rutinamit?, xecha'.

²¹ Y ronojel re' kan xrak'axaj k'a ri Jehová y xpe royowal; rija' kan xuya' k'a pe q'aq' pa kiwi' ri e rijatzul kan ri Jacob kan janila k'a xnimer ri royowal chikij ri israelita.

²² Kere' k'a xuben ri Dios roma kan man xkinimaj ta, y man xkikuquba' ta k'a kik'u'x rik'in ri rukolotajik.

²³ Man rik'in ri', ri Dios kan xch'on k'a chike ri sutz' chila' chikaj, richin kan chi'anin k'a xjaqatej ruchi' ri kaj.

²⁴ Y xuben k'a chi ri aj-chikajil-wey xqaqa-pe pa kiwi' rije' richin xkitej Kan ja ri trigo aj-chikajil ri xuya-pe chike.

²⁵ Kan ja ri kiway ri aj-chikajil ri xkitej ri winaqi' ri'; kan pa ruk'iyal k'a ri xuteq-pe richin jebel xnoj kipan.

²⁶ Xujel rubey ri kaq'iq' ri peteneq pa relebel-q'ij, y xuben chi pa xokon xpe-wi.

²⁷ Xuben chi xqaqa pa kiwi' rije', janila aj-xik' taq chikopi' achi'el ri poqolaj, kan pa ruk'iyal k'a xuya' chike, kan achi'el ri sanayi' ri ek'o chuchi' ri palou.

²⁸ Xuben chike re aj-xik' taq chikopi' re', chi xeqaqa akuchi kimolon-wi-ki' ri israelita. Kan xkisutij k'a kij ri kachoch ri banon rik'in tzieq.

²⁹ Ri winaqi' ri' kan xewa-xe'uk'ya' k'a y kan jebel xnoj kipan; roma ri Dios xuya' chike ri kirayibel rije'.

³⁰ Jak'a kan k'a man jani kekolaj, y k'a yetajin na k'a chutijik ri xkik'utuj,

³¹ jari' toq xqaqa k'a pa kiwi' ri royowal ri Dios. Xuben chi xeken k'a ri más jebel kuchuq'a' chikikojol rije'. Kan xeruk'is k'a ri e cha'on chikikojol ri israelita.

³² Man rik'in ri', xa xemakun chik; stape' xuben meyel taq banobel chikikojol, man xkikuquba' ta kik'u'x rik'in.

³³ Roma ri' xuben chire ri kik'aslen chi xk'is achi'el nik'is-el ri kaq'iq', xuben chike chi ri juna' ri xek'ase-el, rik'in ruk'ayewal xkik'owisaj.

³⁴ Toq nikitz'et chi k'o winaqi' nelesex-el ri kik'aslen, k'ari' nitzolej kik'u'x rik'in rija', k'ari' rik'in ronojel kánima nikikanoj ri Dios richin yeruto'.

³⁵ K'ari' noqaqa chikik'u'x chi ja ri Dios ri kitobal, chuqa' noqaqa chikik'u'x chi ja ri nimalej Dios koloyon kichin.

³⁶ Jak'a xa man qitzij ta ri kich'abel ri nikibij chire, xa kan ruyon k'a q'oloj nikibij.

³⁷ Roma ri kánima xa man choj ta chuwech rija', ni man xkitaqej ta ri kich'abel.

³⁸ Man rik'in ri' ri Dios kan nujoyowaj kiwech, kan nukuy k'a ri kimak y kan man yeruk'is ta; k'iy k'a mul xuq'et ri royowal y kan man xuya' ta pe pa kiwi'.

³⁹ Roma kan xoqaqa k'a chuk'u'x chi rije' xa e relik winaqi', xa e achi'el jun uxla' ri xbe y man nitzolin ta chik pe.

⁴⁰ ¡Kan janipe' na k'a mul xeyakatej chirij chiri' pa tz'iran ruwach'ulew! Kan xkiya' k'a q'axo'n rik'in chupan ri ruwach'ulew ri'.

⁴¹ Kan jantape' k'a xkiyoq'oya' ri Dios beneq ruwech xkiyek royowal ri loq'olej qa-Dios.

⁴² Man xoqaqa ta k'a chikik'u'x ri ruq'a' ri ruya'on pa kiwi', ri q'ij toq xerukol-pe chupan ri ximonri'il.

⁴³ Xa xkimestaj ri meyel taq banobel ri xuben pa ruwach'ulew Egipto, man xoqaqa ta chikik'u'x ri meyel taq banobel ri xeruben ri chiri' pa Soan.

⁴⁴ Xuben chi ri raqen taq ya' richin Egipto xe'ok kik', richin chi ri winaqi' man xetikir ta chik xkiqum.

⁴⁵ Xuteq k'a pe pa taq tzobaj amolo' chikikojol rije' richin chi xekik'is, chuqa' xuben chi xek'iyer-pe xkalet richin chi xuyoj ri kiruwach'ulew.

⁴⁶ Xuben chi ri jut xkik'is ri kitiko'n kan ronojel k'a ri ruwech ri kitiko'n xuya' chike ri sak'.

⁴⁷ Ronojel ri kitiko'n richin uva kan xuk'is k'a rik'in saqboch, keri' chuqa' xuk'is ri kitiko'n richin wíkix rik'in ri chuma-tew.

⁴⁸ Ronojel ri kawej xerujech pa ruq'a' ri saqboch, kan xerujech k'a chuqa' pa ruq'a' ri koyopa'.

⁴⁹ Xuya' pa kiwi' rije' ri rukiy ri royowal, kan janila k'a ruk'ayewal ri xuya' pa kiwi'; jalajoj k'a ruwech ruk'ayewal ri xuteq-pe.

⁵⁰ Kan xuya' ronojel ri royowal pa kiwi'; kan man xujoyowaj ta k'a kiwech, xa kan xerujech pa ruq'a' ri kamik.

⁵¹ Xuben k'a chi xeken konojel ri nabey taq al alaboni' chiri' pan Egipto, ri nabey taq uchuq'a' kichin ri e rijatzul kan ri Cam.

⁵² K'ari' xerelesaj-pe ri qawinaq chikikojol ri aj-Egipto; Xeruyuqej-pe pa tz'iran ruwach'ulew achi'el jun q'ataj karne'l.

⁵³ Xeruyuqej k'a rik'in kuqubabel-k'u'x richin chi man xkixibij ta ki'; y ri palou kan xerumuq k'a kan ri e etzelanel kichin.

⁵⁴ Rija' xeruk'en-pe chupan ri ruwach'ulew ri kan ruch'aron chik chike, xeruk'en-pe pa ruwi' re juyu' re' ri xuch'ek rik'in ri ruchuq'a'.

⁵⁵ Kan xerelesaj k'a el ri winaqi' aj chiri' ri man nikitzeqelibej ta rija'. Xuch'er k'a ri kiruwach'ulew, chikiwech ri qati't-qamama', richin chi ri kalk'ual nikichinaj kan, chikijujunal rik'in ri kitzobaj.

⁵⁶ Jak'a rije' xa jantape' xkitejtobej y xkiyek royowal ri nimalej Dios, y man xkiben ta ri nubij ri rupixa' ri ruya'on chike.

⁵⁷ Rije' xa xkimalij kan ri Dios, xa xkipaba-ki' chuwech achi'el xkiben ri kite-kitata' rije'. Xa xkiben achi'el jun rute-ch'ab ri kotokik chik.

⁵⁸ Xkiyek k'a royowal rik'in ri akuchi nikiya-wi kiq'ij wachibel pa ruwi' taq juyu'. Xkiyek k'a royowal roma xkiya' ruq'ij ri wachibel e toch'on.

⁵⁹ Toq ri Dios xutz'et ronojel re', kan janila k'a xpe royowal, roma ri' kan xeretzelaj k'a konojel ri qawinaq.

⁶⁰ Xumalij k'a kan ri rachoch banon rik'in tzieq, ri paban-q'anej pa Siló, ri jay ri akuchi xk'oje' rija', chikikojol ri qawinaq.

⁶¹ Xuya' k'a q'ij chi xuk'uex-el ri káxa richin ri jikibel-tzij. Xujech k'a pa kiq'a' ri e etzelanel qichin.

⁶² Xuya' q'ij chi ri qati't-qamama' xekamisex chi espada, kan janila k'a royowal xpe chikij rije'.

⁶³ Ri q'aq' kan xeruk'is k'a konojel ri alaboni'; roma ri' ri xtani' man xbixex ta chik ri bix richin k'ulubik chikij.

⁶⁴ Ri e sacerdote chuqa' kan xekamisex k'a chi espada. y ri malka'n taq ixoqi' man xya'ox ta q'ij chike richin xekoq'ej ta.

⁶⁵ Chirij ri' ri ajaw xyakatej achi'el toq niyakatej jun wineq chire ri ruwaran, achi'el jun ri maneq xibinri'il chuwech ri kan kow nuna-ri' roma ruqumun k'iy vino.

⁶⁶ Xuben k'a chi xech'akatej ri e etzelanel kichin y xe'animej. Kan xerunojisaj rik'in k'ix richin jantape'.

⁶⁷ Ri Dios xerixowaj ri e rijatzul ri José; man xrajo' ta k'a ri ruwach'ulew Efraín.*f77*

⁶⁸ Kan jak'a ri tzobaj richin ri Judá ri xucha'; kan ja ri juyu' Sión ri janila xrajo'.

⁶⁹ Chiri' k'a xupaba' chik q'anej ri rachoch, achi'el ri k'o chila' chikaj; kan xujikiba' k'a richin q'asen, achi'el jikil ri ruwach'ulew.

⁷⁰ Jak'a ri David ri xucha' richin xok rusamajel. Kan xrelesaj k'a pe chikikojol ri q'ataj karne'l.

⁷¹ Chupan ri yuq'unik xrelesaj-wi-pe richin chi xeruyuq'uj ri qawinaq, richin chi xok kiyuq'unel ri israelita.

⁷² Keri', kan xeruyuq'uj k'a rik'in ruch'ajch'ojil ránima; xeruyuq'uj k'a rik'in janila etamabel.