Wuj Richin Bix Chire ri Dios 77 - Kaqchiquel Bible

Ri Dios k'o uchuq'a' rik'in*f75*

¹ Yin kan xisik'in k'a chuk'utuxik to'onik chire ri Dios; kan chire k'a rija' xink'utuj-wi roma kan yirak'axaj.

² Chupan ri q'ij toq xbison ri wánima kan xinwoyoj k'a ri wajaw. ri pa taq tokoq'a' man xitane' ta richin xinyakala' ri nuq'a' chuwech rija'; y ri wánima kan man jun k'a uxlanibel xuk'ul.

³ Xinch'ob k'a rij ri Dios y kan xusiloj ri wánima janila, y xinoq'; kan yijilo k'a y kan nimayamo' yan k'a qa ri wánima.

⁴ Ri Jehová kan xuben k'a chuwe chi kan man xok ta ri nuwaran. Kan xsach nuk'u'x, y kan man jun chik k'a ch'abel xitikir xinbij.

⁵ Xinch'obola' k'a rij ri nabey taq q'ij, kan xinch'ob chuqa' rij ronojel ri juna' ri q'axineq chik kan.

⁶ Xoqaqa k'a chinuk'u'x ri nubix ri xenbixala' pa taq tokoq'a', ronojel re' kan xinquqa' k'a rij y xink'utuj k'a qa chuwe yin;

⁷ ¿Kan xkirixowaj kami richin q'asen? ¿Kan man chik xtujoyowaj ta kami nuwech?

⁸ ¿Kan xk'is kami ri rajowabal ri man k'isel ta? ¿Kan xk'is kami chiri' jumul ri rusujun chuwe?

⁹ ¿Kan xumestaj kami ri rujoyowanik? ¿Kan rik'in ta k'a royowal xtutanaba' kan ri rujoyowanik pa nuwi'?, xicha-qa.

¹⁰ Ri más niq'axon wik'in yin chi ja ri Dios man yiruto' ta chik.

¹¹ K'ari' xinch'ob chi xtinquqa' k'a rij ri samaj ri e rubanalon ri Jehová; Ja', kan más k'a utz ninch'ob ri meyel taq banobel ri xeruben ri ojer kan.

¹² Xtinsol k'a rij ronojel ri rusamaj, kan xtinch'ob chik k'a pa kiwi' ri meyel taq rubanobal.

¹³ Nimalej Dios, ronojel ri ye'aben qik'in roj kan e utz-wi; ¿Achike ta chik k'a jun dios k'o ri más nim chawech rat ri at qa-Dios roj?

¹⁴ Ja rat ri at Dios ri yabanon meyel taq banobel; rat nak'ut ri awuchuq'a' chikiwech ri ch'aqa' chik ruwach'ulew.

¹⁵ Rik'in ri awuchuq'a' xojakol roj ri oj atinamit, ri oj kijatzul kan ri Jacob y ri José.

¹⁶ Toq rat xabek'ulun-pe, ri ya' kan xesilon roma xkixibij-ki' chawech; ri siwan ri k'o chupan ri ya' ri' kan xesilon chuqa'.

¹⁷ Ri sutz' kan xrisq'opej k'a pe ri job. Ri koqolajay kan xwajin k'a, y ri koyopa' kan xabakuchi k'a xtz'etetej-wi.

¹⁸ Chupan ri kaq'iq'-job kan xak'axatej k'a chuqa' ri koqolajay; y ri koyopa' kan xusaqirisaj k'a chijun ri ruwach'ulew; roma ri' kan xbaybot k'a y xsilon ri ruwach'ulew.

¹⁹ Chupan k'a ri palou xaq'ax-wi chupan k'a ri janila chi ya' xaben-wi ri abey; jak'a ri retal ri akuchi xaq'ax-wi man jun bey xtz'etetej.

²⁰ Xe'ayuqej k'a ri qawinaq achi'el jun q'ataj karne'l, ja ri Moisés y ri Aarón xe'akusaj richin xeyuqen kichin.