Wuj Richin Bix Chire ri Dios 76 - Kaqchiquel Bible

Ri Dios richin ch'akonik*f74*

¹ Ri Dios kan janila etaman ruwech chupan ri ruwach'ulew Judá; ri rubi' rija' kan nimirisan k'a chupan chijun ruwach'ulew Israel.

² Ri rachoch, kan pa Jerusalem k'o-wi, rija' kan chiri' pa juyu' Sión k'es-wi.

³ Chiri' k'a xeruq'ej-wi ri kokoj raqen ch'ab ri kan yekamisan, xeruq'ej chuqa' ri tobel, ri espada y ronojel ruwech kamisabel.

⁴ Nimalej Dios, rat kan nim k'a ri aq'ij-ak'ojlen. Ri ak'ojlemal kan más k'a nim ke chuwech ri juyu' ri kan ek'o richin q'asen.

⁵ Ri achi'a' ri kan man nikixibij ta ki', xa kan xelesex k'a ronojel chike; xa xepunupuxin kan, y man jun bey chik xkeyakatej-el, ri kiq'a' ri achi'a' ri', xa kan xetuqutu' k'a qa.

⁶ Rik'in ri ach'olinik rat Jehová, kan xek'is k'a ri ki-carruaje y ri kikiej.

⁷ Kan xaxe wi k'a rat ri k'o akiy ¿Achike ta k'a wineq xtitikir xtupaba-ri' chawech toq awoyowal?

⁸ Kan k'a chila' chikaj xaya-wi-pe ri ruchojmilal, y konojel ri winaqi' chuwech re ruwach'ulew kan xkixibij-ki', y kan jun k'a xek'oje-wi.

⁹ Kere' k'a xbanatej toq rat nimalej Dios xayakatej richin xaq'et-tzij, richin chi xe'akol konojel ri xetz'ilox.

¹⁰ Kan qitzij wi chi chupan ri royowal ri wineq, xa kan ninimer ri utzilej atzijol rat. Kan ja rat xkaqasan ruwi' ronojel ri ch'aqa' chik oyowalen.

¹¹ Jak'a roj kan xtiqaya' ri xtiqasuj chire ri Jehová; konojel ri ek'o chunaqaj, tikik'ama-pe sipanik chire ri kan k'o-wi rukiy.

¹² Ja ri Jehová nelesan kik'aslen ri aj-raqen; kan nuben chike ri rey chi nik'oje' rukiy rija' chikiwech.