Wuj Richin Bix Chire ri Dios 75 - Kaqchiquel Bible

Ja ri Dios ri q'atoy-tzij*f73*

¹ Yojmatioxin chawe qa-Dios, kan yojmatioxin-wi k'a, roma rat naqaj atk'o chiqe roj. Roj kan niqatzijoj k'a ri meyel taq banobel ri ye'aben rat.

² Rat kan kere' k'a nabij: Yin ninq'et-tzij toq ninwajo' yin, kan xtinq'et k'a tzij rik'in ruchojmilal.

³ Toq nisilon ri ruwach'ulew y konojel ri ek'o chuwech, ja yin ri yichapo ri temeyon richin.

⁴ Yin kan ninbij k'a chike ri e nakaneq chi man tikinimirisaj-ki'; chike ri maneq Dios chikiwech, ninbij chi kan tikiqasaj-ki'.

⁵ Ninbij chike ri k'o kuchuq'a', chi man tikinimirisaj-ki'. Y toq yech'on, man tikiben chi kan janila e nima'q, yacha'.

⁶ Ri ruchojmilal man nipe ta kere' pa relebel-q'ij, ni man nipe ta pa qajbel-q'ij. Chuqa' man peteneq ta pa tz'iran ruwach'ulew, ni ta pa taq juyu'.

⁷ Ri Jehová ri chojmirisey richin ronojel ri yebanatej; k'o ri nuqasaj kiq'ij y k'o ri nunimirisaj kiq'ij.

⁸ Ri ruchojmilal ri' achi'el jun qumbel nojineq chi vino ri janila ruchuq'a'. Re ruchojmilal re' kan xtutix k'a pe rija', y ri winaqi' ri maneq Dios chikiwech, kan xtikiqum k'a ronojel, y man jun chik k'a tz'uj xtik'oje' kan.

⁹ Jak'a yin kan jantape' xtintaluj rutzijol ri rubanobal ri nu-Dios, xtinbixaj k'a rubi' ri ru-Dios ri Jacob.

¹⁰ Ri kuchuq'a' ri e banoy etzelal kan xtich'akatej k'a. Jak'a ri kuchuq'a' ri kan choj kik'aslen kan tinimirisex.