Wuj Richin Bix Chire ri Dios 74 - Kaqchiquel Bible

Ch'owen richin nikolotej ri tinamit.*f71*

¹ Nimalej Dios, ¿achike roma oj amalin kan jumul? ¿Achike roma kan yakatajineq awoyowal chiqij roj ri oj achi'el akarne'l richin ri aqejoj?

² Toqaqa chi'ak'u'x ri tzobaj winaqi' ri xacha' rat ri ojer kan, ri xakol-pe, richin chi xojok awichin rat, Toqaqa chi'ak'u'x ri juyu' Sión ri akuchi xak'oje-wi.

³ Katanpe richin no'atz'eta' re jantape' wulatejineq. To'atz'eta' ronojel ri itzel ri xkiben ri e etzelanel qichin rik'in ri awachoch.

⁴ Ri e etzelanel awichin rat kan yesik'in k'a chupan ri awachoch, Kan kiya'on k'a retal richin nikik'ut chi xech'akon.

^5-6 Rije' kan rik'in k'a ikej xekiwulaj ri wiqobel ri ek'o chupan ri awachoch. Kan e achi'el k'a ri e choyoy che' chupan ri k'echelaj.

⁷ Kan xkiya' k'a ruq'aq'al ri awachoch; xkiqasaj ruq'ij ri awachoch ri akuchi ninimirisex-wi ri abi', y xkiben chire chi man jun rejqalen.

⁸ Kan xkiya' k'a chikiwech richin yojkik'is jumul. Xekiporoj k'a ronojel jay ri akuchi niqamol-wi-qi' richin niqaya' aq'ij.

⁹ Kan man jun chik xk'oje' kan chire ri xek'atzin chupan ri awachoch. Kan xek'is k'a ri e q'alajirisey ach'abel. Ni ta re chiqakojol roj kan man jun k'a etamayon k'a janipe' nibetane' ronojel re'.

¹⁰ Nimalej Dios, ¿k'a janipe' kami xtitane' chiqij ri yojya'on pa q'axo'n? ¿Chaq xtuyoq' ta k'a ri abi' ri etzelanel awichin richin q'asen?

¹¹ ¿Achike roma man jun naben chike? ¿Achike roma chaq aq'eten aq'a' chiri', y man jun naben chike?

¹² Qa-Dios roj, kan ja rat ri at qa-rey ojer-pe ri'. Ja rat ri xaya'on-pe ri ch'akonik pa ruwi' ri qaruwach'ulew.

¹³ Xach'er k'a rupan ri palou rik'in ri awuchuq'a'. Kan xapaxij k'a kijolon ri nima'q taq chikopi' ri ek'o chupan ri ya'*f72*.

¹⁴ Xapitz' k'a ri rujolon ri nimalej chikop, y xaben k'a chire chi xok kiway ri chikopi' ri ek'o pa tz'iran ruwach'ulew.

¹⁵ Xe'ajeq k'a ri ralaxbel taq ya' y ri ch'uti'n raqen taq ya', y xachaqirisaj k'a rupan ri nima'q taq raqen-ya'.

¹⁶ Ja rat xabanon ri q'ij y ri aq'a', rat xe'ajikiba' ri ik' y ri q'ij.

¹⁷ Ja rat xaya'on ri ruk'ulba't ri ruwach'ulew. Ri saq'ij y ri job ja rat xachojmirisan.

¹⁸ Toqaqa k'a chi'ak'u'x chi ri e etzelanel kan kiya'on ak'ix rat Jehová. Chuqa' ri e nakaneq taq winaqi' xa yatkiyoq' k'a rat.

¹⁹ Roj ri oj achi'el jun ti paloma man qojajech pa kiq'a' ri itzel taq winaqi'. Man qojamestaj kan roj y qojato' pa kiq'a' rije'.

²⁰ Toqaqa chi'ak'u'x ri jikibel-tzij ri abanon qik'in, roma pa taq latz' bey ek'o ri kamisanela'.

²¹ Man taya' q'ij chi yek'ixbitej ri winaqi' ri yetz'ilox. Kan ta k'a xtikiya' aq'ij ri e k'ayewatajineq y ri kan man jun ok k'o kik'in.

²² Kayakatej k'a nu-Dios, y tato-awi'. toqaqa chi'ak'u'x chi ri e nakaneq jantape' yatkiyoq'.

²³ Man tamestaj-qa chi ri e etzelanel awichin jantape' yesik'in chawij, y ri kiyakatajinenri'il man yetane' ta chire.