Wuj Richin Bix Chire ri Dios 71 - Kaqchiquel Bible

Ch'owen rik'in ri Dios richin jun ri kan beneq chik rujuna'

¹ Jehová, kan awik'in k'a rat nuto'on-wi-wi', man k'a taya' q'ij richin yin yik'ixbitej.

² Kinato' y kinakolo' rik'in ri achojmilal; kan kinawak'axaj k'a y kinakolo'.

³ Kinawewaj, achi'el xa ta ninwewaj-wi' chirij jun nimalej abej. Rat kan abin k'a chi kan yinakol, roma kan ja rat ri at nutobal yin.

⁴ Nu-Dios yin, kinakolo' k'a pa kiq'a' ri man yatkitzeqelibej ta rat, pa kiq'a' ri e banoy taq etzelal y kan janila e mal.

⁵ Roma kan ja rat ajaw Jehová ri at woyoben, rat ri at nukuqubabel-k'u'x kan ja toq in ak'ual y k'a re wakami.

⁶ Ja rat xato'on wichin toq k'a man jani kinalex, kan ja rat k'a xabanon richin chi yin xinalex. Roma ri' kan jantape' k'a xtinya' aq'ij.

⁷ E k'iy ri kan yinkimey; jak'a yin kan awik'in rat ninto-wi-wi'.

⁸ Kan xaxe ta k'a ri bix chawe rat ri xtel-pe pa nuchi', kan chijun q'ij ta k'a xtinya' aq'ij ak'ojlen.

⁹ Man kinawixowaj chupan ri nurijixinen; Man kinamalij re maneq chik wuchuq'a'.

¹⁰ Roma ri e etzelanel wichin yech'on chuwij, ri yeq'eleben wichin kan xkiya' chikiwech chi nikelesaj ri nuk'aslen,

¹¹ y nikibij: Ri Dios xa xumalij yan kan; tiqoqotaj y tiqachapa', roma xa man jun xtikolon pa qaq'a', yecha'.

¹² Nu-Dios yin, tabana' utzil man kinaya' kan nej chawe rat. Nu-Dios yin, chi'anin katanpe richin yinato'.

¹³ Kek'ixbitej y kek'is jumul konojel ri e etzelanel wichin; kan tikaqer k'a kipalej roma k'ix y xtisach kik'u'x ri nikajo' chi yin yik'oje' pa k'ayew.

¹⁴ Jak'a yin kan jantape' ninkuquba' nuk'u'x awik'in. Kan xtinya' k'a aq'ij richin jantape'.

¹⁵ Yin kan chijun q'ij k'a xtintzijoj ri ruchojmilal ri naben rat. Xtintzijoj k'a ri rubanik richin xojakol, stape' man yitikir ta ninbij ronojel, roma man e ajlatel ta.

¹⁶ Xtintaluj k'a rutzijol ri nima'q taq banobel ri xaben rat Jehová ri at qajaw. Kan xtinnataj k'a jantape' ri ruchojmilal ri kan xaxe rat yabano.

¹⁷ Nimalej Dios, kan k'a pa nuk'ajolil k'a aya'on ri tijonik chuwe; y k'a re wakami, yin kan nuq'alajirisan-pe ri meyel taq abanobal.

¹⁸ Stape' chupan re nurijixinen y kere' seq chik nujolon, tabana' utzil nu-Dios, man kinamalij kan. Roma kan k'a k'o chi nintzijoj ri awuchuq'a' rat, chike ri k'a e ak'uala' na y ri man jani ke'alex.

¹⁹ Nimalej Dios, ri ruchojmilal ri naben kan napon k'a chila' chikaj. ¡Kan abanon k'a nima'q taq banobel! ¿Achike ta chik k'a jun k'o achi'el rat?

²⁰ Rat xabanon chuwe chi xinq'axaj bis y ruk'ayewal, Jak'a kan xtaya' chik ri nuk'aslen y xkinayek chik el chuxe' ri ulew.

²¹ Xtanimirisaj k'a nuq'ij, y kan xtakuquba' chik k'a nuk'u'x.

²² Kan xtinya' k'a aq'ij rik'in q'ojom, nu-Dios yin, roma man in amalin ta kan, xtinbixaj ri abanobal rik'in ri arpa, kan ja rat k'a ri at loq'olej qa-Dios.

²³ Rik'in k'a kikoten xtinya' aq'ij. Chuqa' xkikikot roma xinakol.

²⁴ Yin kan chijun q'ij xaxe k'a ri ruchojmilal ri naben rat, ri xtinbij. Roma ri xkajo' chi xinkiya' ta pa k'ayew xa xek'ixbitej y xsach kik'u'x.