Wuj Richin Bix Chire ri Dios 69 - Kaqchiquel Bible

Raqoj-chi'ij richin bis*f67*

¹ Nimalej Dios, tabana' utzil kinakolo' roma xa kan ink'o pa k'ayew, achi'el xa ta ink'o chupan jun palou y yijiq' yan.

² Kan yik'is yan k'a qa chupan ri ch'abeq ri kan janila nim rupan, y kan man jun chik akuchi ta utz ninya-wi ri waqen. Kan xinapon k'a chupan ri más nim rupan ri ya', yin ninna' chi xa kan yiruqirirej-el.

³ Xikos yan janila, roma yisik'in chuk'utuxik to'onik, ri nuqul kan niq'axon chik, y xjasjo' yan. Ri runaq'-nuwech chuqa' nik'is yan qa ruchuq'a', roma yatinkanoj rat nu-Dios.

⁴ Yinketzelaj y xa man jun achike ta roma; janila k'a xek'iyer, y kan man e ajlatel ta chik, kan más chik k'a xek'iyer ke chuwech ri rusumal-nuwi'. Ri e etzelanel wichin kan xk'oje' k'a kuchuq'a'. Kan nikich'ojij k'a chuwe ri xa man xinweleq'aj ta.

⁵ Rat kan awetaman k'a ri nubanobal ri xinben, ri man xinch'ob ta; ri numak, kan man e ewatel ta k'a chawech.

⁶ Ajaw, tabana' chi man ta woma yin xkek'ixbitej ri kikuquban kik'u'x awik'in rat, Jehová k'iytisanel richin ronojel. Man ta k'a woma yin xtisach kik'u'x ri yekanon awichin rat, nimalej qa-Dios.

⁷ Roma nukuquban nuk'u'x awik'in, ri winaqi' yinkik'ixbisaj; roma ri' ri nupalej kan kaqarineq roma k'ix.

⁸ Ri nuwinaq kan nikiben chuwe achi'el man in kiwinaq ta. Ri wach'alal nikiben chuwe achi'el man in aj wawe' ta,

⁹ roma kan janila ninwajo' ri awachoch y kan nupaxij wánima ri niban chire, y ri itzel taq ch'abel ri yekibila' chawe richin k'ix, kan chuwij k'a yin niqaqa-wi.

¹⁰ Toq yinoq' y yimewayin rik'in bis, rije' xa yetze'en chuwij.

¹¹ Toq ninkusaj ri nutziaq richin bis, konojel rije' nikiben chuwe chi yinok yakol kitze'en.

¹² Ri winaqi' ri yetz'uye' chuchi' ri tinamit, yech'on itzel chuwij, y ri q'abarela' yinkiyojobej rik'in ri kibix.

¹³ Jak'a yin kan awik'in rat Jehová yitzijon-wi, kinakolo' toq rat keri' nawajo'. Kinawak'axaj k'a roma ri awajowabal, y tajoyowaj nuwech.

¹⁴ Kinawelesaj chupan re ch'abeq y tabana' chi man ta xkik'is-qa chupan. Kan ta k'a xkitotej chikiwech ri ye'etzelan wichin, kan ta k'a xkitotej chuwech ri palou.

¹⁵ Man taya' q'ij chi yiruqirirej-el ri ya', ni man ta yirubeq' ri nimalej siwan, man ta yimuqutej kan chupan ri nimalej jul.

¹⁶ Tak'uluba' k'a pe ri nuch'abel Jehová, roma ri ajoyowanik kan janila nim. Kinatzu' k'a pe achi'el ri nimalej awutzil.

¹⁷ Man tawewaj-awi' chinuwech, yin ri in asamajel, roma ink'o pa nimalej bis; tabana' utzil kinawak'axaj chi'anin.

¹⁸ Kajel k'a pe wik'in, y kinakolo'. Kinato' k'a chikiwech ri e etzelanel wichin.

¹⁹ Rat kan atzuliben k'a ronojel ri k'ixbilal ri nink'owisaj, ri nuq'axo'n y ri qasanri'il ri niban chuwe; jak'a kan chawech rat ek'o-wi ri e etzelanel wichin.

²⁰ Ri q'axo'n kan rusokon k'a ri wánima y kan in k'ayewatajineq. Kan xinwoyobej chi k'o ta jun xjoyowan nuwech y kan man jun. Xinwajo' chi k'o ta xkuquban nuk'u'x, jak'a kan man jun.

²¹ Chupan ri nuway xkixol kamisanel aq'om, y toq xchaqi'j nuchi', xa xkiya' k'ayilej-vino chuwe.

²² Jehová, tabana' chi ri kinimaq'ij re winaqi' re' xa xtik'atzin ta richin pikbel chike; y ri utz nikitz'et rije', kan ta k'a xkerutzeq.

²³ Tabana' chi rije' xkemoyir, chuqa' xkelukulu' ta richin man ta yetikir yepa'e'.

²⁴ Tataqa' k'a pe ri awoyowal pa kiwi' rije', y ri awoyowal ri yakatajineq kan ta k'a xkeruq'i' rije'.

²⁵ Ri akuchi ek'o-wi-qa kan ta xtitole', y kan ta man jun chik xtik'oje' kan chupan ri kachoch.

²⁶ Roma kan chaq xkitzeqelibej ri aya'on q'axo'n pa ruwi', y kan xetze'en k'a chirij jun ri k'o pa ruk'ayewal.

²⁷ Toqaqa chi'ak'u'x ronojel ri kimak, y man taya' k'a ri kolotajik chike.

²⁸ Tayojo' kibi' chupan ri wuj ri akuchi tz'ibatel-wi kibi' ri kan yek'ase' richin q'asen, kan man tik'oje' ri kibi' chikikojol ri choj kik'aslen.

²⁹ Jak'a yin ri kan in k'ayewatajineq y janila q'axo'n wik'in, kan kinato' richin xkikolotej chuwech re'.

³⁰ Yin kan xtinnimirisaj ri abi' rik'in ri nubix; xtintzijoj ri awuchuq'a' rik'in matioxinik pa wánima.

³¹ Re' kan xtak'awomaj k'a rat Jehová más ke chuwech ri sipanik rik'in bóyix. Kan más niqa' chawech re', chuwech jun alaj achij wákix.

³² Toq xtikitz'et re' ri e poqonatajineq kan xkekikot. Konojel ri winaqi' ri nikikanoj ri Dios, kan xtikikot ri kánima.

³³ Ri Jehová kan yerak'axaj ri man jun k'o kik'in, y kan man yerixowaj ta ri ek'o pa ximonri'il.

³⁴ Kan tiya' k'a ruq'ij ri Dios chi'iwonojel rix ri ixk'o chuwech ri kaj y ri ruwach'ulew. Keri' chuqa' ri ixk'o pa nimalej taq palou.

³⁵ Ri Dios kan xtukol k'a ri tinamit Sión, y xkeruyek chik k'a q'anej ri ch'aqa' chik tinamit richin Judá. Chiri' k'a xkek'oje' chik ri winaqi' y ri ruwach'ulew kan xtok chik kichin.

³⁶ Ri e kijatzul ri e rusamajela' ri Dios, kan xtikichinaj k'a ri ruwach'ulew. Konojel ri ye'ajowan richin ri Dios kan xkek'oje' k'a chiri'.