Wuj Richin Bix Chire ri Dios 68 - Kaqchiquel Bible

Ri bix richin toq xech'akon ri israelita*f66*

¹ Ri Dios kan xtiyakatej y ri e etzelanel richin xa xtikitaluj-el-ki'; ri man ye'ajowan ta richin, xa xke'animej chuwech.

² Achi'el nutaluj-el-ri' ri sib, keri' nikitaluj-el-ki', achi'el niya'er-qa ri cera chuwech ri q'aq', keri' xkek'is-el ri banoy etzelal chuwech ri Dios.

³ Jak'a ri choj kik'aslen kan xkekikot; kan xkenimaq'ijun k'a chuwech ri Dios y xketzopiyaj roma kikoten.

⁴ Roma ri' kan tibixaj k'a rubi' ri Dios, kan tiya' k'a bix chire; tinimirisaj k'a rubi' ri nibiyaj pa ruwi' ri sutz'. Jehová jari' ri rubi'. ¡Kan kixkikot k'a chuwech rija'!

⁵ Ri Dios kan tata'aj k'a chike ri meba'i' y to'onel kichin ri malkani' Kan k'a chupan k'a ri rachoch yeruto-wi-pe.

⁶ Kan nuben chi ri e malin kan, kan ye'ok ach'alalri'il kik'in ch'aqa' chik, kan nuben chuqa' chike ri e ximil chi kan yekolotej; jak'a ri man nikinimaj ta tzij, nuben chike chi xkek'oje' chupan jun ruwach'ulew chaqi'j-chaqi'j.

⁷ Nimalej Dios, toq rat xatik'o-pe chuwech ri atinamit, toq xaq'axaj ri tz'iran ruwach'ulew,

⁸ ri ruwach'ulew kan xsilon y kan xqaqa k'a pe ri job chila' chikaj; roma rat atk'o chiri', ri juyu' Sinaí kan xsilon, xsilon k'a chawech rat ri at qa-Dios roj israelita.

⁹ Nimalej Dios, rat xaben chi xpe janila chi job; ri atinamit ri nimayamo' yan qa xaben chire chi xk'oje' chik el ruchuq'a'.

¹⁰ Ri qawinaq kan chiri' k'a pa tz'iran ruwach'ulew xek'oje-wi. Rik'in ri awutzil xaya' ri k'atzinel chike ri man jun k'o kik'in.

¹¹ Ri ajaw kan nich'on k'a pe, y ri ixoqi' kan xkitaluj k'a ri utzilej rutzijol.

¹² Nikibij k'a: ¡Xe'animej, xe'animej ri e rey kichin ri e etzelanel qichin!, yecha'. Y ri ixoqi' chiri' pa kachoch xkitaluj k'a chikiwech ri k'o rejqalen ri xkik'en-pe pa labal

¹³ Xkitaluj k'a kiwachibel paloma ri ya'on saqipueq chirij, ri kixik' ya'on q'anapueq chirij, ¿Rix achi'a' ri xixk'oje' kan kik'in ri iwawej, achike roma man xixbe ta pa labal?

¹⁴ Toq ri Dios xerutaluj-el konojel ri rey chiri' pa juyu' Salmón, ri juyu' ri', kan achi'el xa ta xqaqa chuma-tew pa ruwi' nitzu'un.

¹⁵ ¡Juyu' richin Basán, ri kan richin ri Dios! ¡kan janila k'a nim ri ijotolen!

¹⁶ ¿Achike k'a roma nich'upun ik'u'x rix nima'q taq juyu' chirij ri juyu' ri rucha'on ri Dios richin chi chiri' niq'aton-wi-tzij? Kan qitzij wi chi chiri' xtik'oje-wi rija' richin jantape'.

¹⁷ Ri carruaje ri e richin ri Dios, kan man e ajlatel ta. Chikikojol k'a ri' xpe-wi ri Dios toq xel-pe pa Sinaí, richin xpe chupan ri rachoch.

¹⁸ Toq xjote-q'anej pa rachoch, rija' kan e k'iy e etzelanel richin xeruk'uaj pa ximonri'il. Chuqa' kan k'iy sipanik ri xuk'ul chuwi-kiq'a' ri winaqi' ri xeyakatej chirij, y ri Jehová chiri' xtik'oje-wi richin jantape'.

¹⁹ ¡Nimalej ruq'ij ri ajaw, ri qakolonel! rija' kan q'ij-q'ij yojruto' rik'in ri tijoj-poqonal ri niqaq'axaj.

²⁰ Ri Dios, ri kan qa-Dios roj, jari' ri xtikolon qichin. Ri Jehová ri qajaw, xqojrujech'ej chuwech ri kamik.

²¹ Kan qitzij wi chi ri Dios xch'akon chikij ri e etzelanel richin, chikij ri man xkiya' ta kan rubanik ri mak.

²² Y rija' xubij chi xkeruk'en-pe chiri' pa Basán. Chuqa' xkeruk'en-pe pa runik'ajal ri palou,

²³ richin chi xtikipalibej ri kikik'el ri e etzelanel kichin, y re kik' re' kan xtikireq' chuqa' ri tz'i'.

²⁴ Titz'eta' k'a ri rutinamit ri Dios ri pa cholajen e peteneq, e peteneq chirij ri nimalej qa-Dios y rey richin nok-apo pa rachoch.

²⁵ Ri bixanela' e beneq k'a pa nabey, ri q'ojomanela' e xambey kan, pa kinik'ajal rije' e beneq xtani' kik'ualon pandereta.

²⁶ Tinimirisaj ruq'ij ri Dios chupan ri molojri'il, Chi'iwonojel rix israelita tinimirisaj ruq'ij ri ajaw.

²⁷ Chiri' k'o-wi chuqa' ri tzobaj richin ri Benjamín, ja rija' ri k'o pa kiwi', jak'a ri e tata'al richin ri tzobaj Judá, ek'o chupan ri kimolojri'il, keri' chuqa' ri e tata'al richin ri tzobaj Zabulón y ri Neftalí.

²⁸ Nimalej Dios, kan tak'utu' k'a ri awuchuq'a', tak'utu' ri awuchuq'a' ri xak'ut chiqawech roj.

²⁹ Kan k'a chupan ri nimalej awachoch ri k'o pa Jerusalem, akuchi ri e rey richin ch'aqa' chik ruwach'ulew xtikisuj sipanik chawe.

³⁰ Ke'aq'ata' ri aj-Egipto ri e achi'el nima'q taq chikopi' chukojol ri q'ayis pop. Ke'awoqotaj ri ch'aqa' chik ruwach'ulew, ri e achi'el tzobaj achija' y alaji' taq wákix, ri winaqi' ri kan xaxe richin yebeyomer nikiqasaj kiq'ij ch'aqa' chik, ke'ataluj k'a el konojel winaqi' ri xaxe oyowal ri niqa' chikiwech.

³¹ Xkepe k'a ri e aj-raqen ri ek'o pa ruwi' ri Egipto; Chuqa' ri e aj-raqen ri ek'o pa ruwi' ri Etiopía, kan xtikiyek k'a ri kiq'a' chawech rat richin nikiya' aq'ij.

³² ¡Konojel k'a winaqi' richin chijun ruwach'ulew, kebixan richin nikiya' ruq'ij ri Dios; kan tikinimirisaj k'a ruq'ij ri ajaw,

³³ tikinimirisaj ruq'ij ri nibiyajilan pa ruwi' ri kaj ri kan k'o-pe tibe-q'ij tibe-seq! Rija' xtuben chi kan xtak'axatej ri ruch'abel ri kan k'o uchuq'a' ruk'uan.

³⁴ Kan tiqaya' k'a rejqalen ri ruchuq'a' ri Dios, roma ja rija' niq'aton-tzij pa qawi' roj israelita. Y ri ruchuq'a' kan niqatz'et chuwech ri kaj.

³⁵ Roj kan yojk'ark'ot roma xibinri'il toq ri Dios nel-pe chupan ri rachoch. Jak'a rija' kan nuya' quchuq'a'. Tiqaya' k'a ruq'ij ri nimalej qa-Dios.