Wuj Richin Bix Chire ri Dios 65 - Kaqchiquel Bible

Ri rutzil ri Dios pa ruwi' re ruwach'ulew*f63*

¹ Nimalej Dios, kan awichin k'a rat ronojel bix ri yebixex chupan ri tinamit Sión. Kan ruk'amon k'a chi nitoj ronojel ri sujun chawe.

² Kan awik'in k'a rat xkepe-wi konojel ri winaqi', roma rat kan nawak'axaj ronojel ri ch'owen ri yeban awik'in.

³ Ri itzel taq qabanobal kan yojruch'ek, jak'a rat kan nakuy ronojel ri yakatajinenri'il ri yeqaben.

⁴ Kan jebel k'a ruwa-qaq'ij roj ri xojacha' rat richin yojk'oje' awik'in, richin chi yojk'oje' chuwa-jay chire ri awachoch. Kan xqojch'uch'u' k'a rik'in ri utzil ri k'o chupan ri awachoch.

⁵ Kan nak'uluba' k'a pe ri qach'abel rik'in meyel taq banobel y pa ruchojmilal, ja rat nimalej Dios ri at qakolotajik, awik'in k'a rat kikuquban-wi kik'u'x konojel ri winaqi' richin chijun ri ruwach'ulew, konojel ri ek'o chuchi' taq palou ri k'a janila nej ek'o-wi.

⁶ Rik'in ri nimalej awuchuq'a', rat xe'ajikiba' ri nimalej taq juyu'. Kan at nojineq k'a rik'in uchuq'a'.

⁷ Rat kan naben k'a chi toq nijinin-pe ri palou, kan nitane-qa, Kan napaba' k'a ri ya' ri nibolqo't pa ruwi' ri palou, chuqa' kan natanaba' ri kich'abel ri winaqi' ri yeyakatej chawij rat.

⁸ Roma ri' konojel winaqi' richin ri ruwach'ulew nikik'en rukiy ri meyel taq abanobal. Kan ja rat yabanon chi k'o kikoten, toq nel-pe ri q'ij nimaq'a' yan y toq niqaqa ri q'ij.

⁹ Kan no'atz'eta' k'a qa re ruwach'ulew y kan naya'aj; kan janila k'a nim beyomel naya' pa ruwi'. Rik'in ri ya' ri k'o awik'in, rat naben k'a chi nik'iy-pe ri tiko'n. Kan niwachin k'a roma kan keri' ri arayibel rat.

¹⁰ Kan naben k'a chi ri boloj kan yemu'e-qa, y ri ya' yebiyin k'a chukojol. Rik'in ri job kan buyul-buyul k'a nuben ri ulew, y yojawurtisaj k'a rik'in ri qatiko'n.

¹¹ Toq napon ri jun juna', rat naben chi ri tiko'n niwachin pa ruk'iyal, y naben chi ri sutz', chuqa' nuk'en-pe beyomel pa ruk'iyal.

¹² Re' kan nuben chi ri q'ayis ri ek'o pa taq juyu' rex-rex nitzu'un, y ronojel ri ruwa taq juyu' kan yek'ases.

¹³ Kan ninoj k'a ri ruwa-taq'aj chi awej ri nikitej kiq'os chijun k'a ri qasanbel-ulew kan nojineq k'a rik'in jalajoj ruwech ixin. Roma ri' konojel xkebixan rik'in janila kikoten.