Wuj Richin Bix Chire ri Dios 63 - Kaqchiquel Bible

Ja ri Dios ri nikuquban ruk'u'x ri wineq*f61*

¹ ¡Nimalej Dios, ja rat ri at nu-Dios! Yin kan jantape' k'a yatinkanoj; ri wánima kan nichaqchi'in chawij. Yin kan yatinrayij k'a toq ink'o chupan re ruwach'ulew chaqi'j y tz'iran akuchi maneq ya'.

² Richin nintz'et ri awuchuq'a' y ri ak'ojlemal. achi'el toq xatintz'et chupan ri awachoch.

³ Roma kan más jebel ri ajoyowanik rat ke chuwech ri k'aslen, kan xtinbixaj k'a ri abi' jantape'.

⁴ Kan chijun k'a ri nuk'aslen xtinya' aq'ij, kan xtinyek k'a ri nuq'a' richin yitzijon awik'in.

⁵ Xaben k'a chi xch'uch'u' ri wánima achi'el xa ta jebel in wayneq. Kan rik'in k'a kikoten xtinbixaj bix chawe richin ninya' aq'ij.

⁶ Ri chi'aq'a' toq ink'o chik pa nuwarabel kan yich'obon k'a awik'in rat. Ri pa taq nik'aj-aq'a', kan ninquqa' k'a rij ri at achike rat.

⁷ Roma kan ja rat yato'on wichin, roma ri' kan xkik'oje' rik'in kikoten chuxe' ri aq'a' rat.

⁸ Chijun ri nuk'aslen xa jun rubanon awik'in rat; kan in ayuqen k'a rik'in ri awijkiq'a'.

^9-10 Jak'a ri ye'ajowan nikelesaj ri nuk'aslen xa xkekamisex; xkekamisex chi espada, y ri kich'akul kan xtok kiway ri chikopi' ri ek'o pa k'echelaj.

¹¹ Ri rey kan xtikikot awik'in rat Jehová. Ri wineq ri nujikiba' rutzij pan abi' kan xtuk'ul k'a ruwaq'ijaj. Jak'a ri e tz'ukuy taq tzij xa xtitz'apex ri kichi'.