Wuj Richin Bix Chire ri Dios 62 - Kaqchiquel Bible

Kan xaxe ri Dios ri qatobal*f60*

¹ Kan xaxe k'a rik'in ri Dios nuxlan ri wánima. Kan rik'in k'a rija' nipe-wi ri nukolotajik.

² Kan xaxe k'a rija' ri nutobal y ri nukolotajik. Rik'in rija' ninto-wi-wi' y kan man xkijilijo' ta k'a.

³ Jak'a rix ri ix etzelanel wichin, ¿k'a janipe' k'a xkixtane' richin chaq yiniyoq'oya'? ¿Kan jantape' ta k'a xtiwajo' yinitzeq, achi'el jun qejoj o jun tz'aq ri xa niwuluwu' yan qa?

⁴ Kan chaq niyala' k'a chiwech richin yinitzeq y niqasaj nuq'ij; Kan yixkikot k'a rik'in ri tz'ukuj-tzij; Rik'in ri ichi' ye'ibila' utzilej taq ch'abel, jak'a pan iwánima xa ruyon etzelal k'o.

⁵ Kan xaxe k'a rik'in ri Dios ninwil-wi uxlanen. Yin kan pa ruq'a' rija' woyoben-wi ronojel.

⁶ Kan xaxe k'a rik'in rija' ninto-wi-wi' y ja rija' ri nikolon wichin. Ja rija' ri nutobal y roma ri' kan man xkijilijo' ta k'a.

⁷ Kan rik'in ri Dios k'o-wi ri nukolotajik y ri nuruwaq'ijaj; rik'in rija' k'o-wi ri nutobal ri akuchi ninto-wi-wi' yin.

⁸ Chi'iwonojel rix winaqi', jantape' tikuquba' ik'u'x rik'in. Titzijoj chire ronojel ri k'o pan iwánima, roma rija' kan jari' ri qatobal.

⁹ Kan qitzij wi, chi ri wineq xa q'axel achi'el ri kaq'iq', Stape' beyom o k'o ta pa meba'il, xa kan maneq rejqalen. Wi ta ye'etex pa jun etabel konojel, kan yek'ulun chi xa man jun kejqalen.

¹⁰ Man tikuquba' ik'u'x rik'in ri banoj kamik, ni man ninimirisaj-iwi' roma ri iweleq'. Wi nik'iyer-q'anej ri ibeyomel, man tikuquba' ik'u'x rik'in.

¹¹ Ri Dios xuq'alajirisaj chi rija' janila ruchuq'a'. Y yin kan wak'axan k'a, chi rik'in ri Dios nipe-wi ronojel uchuq'a'.

¹² Ajaw, rat kan at joyowanel, kan qitzij wi chi rat xtaya' rajel ruk'exel ri rusamaj ri wineq.