Wuj Richin Bix Chire ri Dios 61 - Kaqchiquel Bible

Ri Dios jari' ri nutobal*f59*

¹ Nu-Dios yin, tabana' utzil tawak'axaj ri nuch'abel. Kan tak'ulu' ronojel ri nuch'owen ri ninben awik'in.

² Kan k'a pa ruk'isibel chire ri ruwach'ulew xkich'on-wi awik'in, kan xkich'on k'a awik'in toq ri wánima janila nibison. Kinak'uaj, k'a pa ruwi' ri abej ri más nim chinuwech yin.

³ Roma kan ja rat ri at nutobal, ja rat ri kan achi'el jun tz'aq ri asurin-wij chuwech ri etzelanel wichin.

⁴ Yin ninrayibej chi yik'oje' ta chupan ri awachoch jantape'. Kan kuqul k'a nuk'u'x xkik'oje' chuxe' ri awutzil.

⁵ Roma rat nu-Dios, kan awak'axan ri nusujun chawe yin. Y xaya' chuwe ri ruk'amon richin nikichinaj ri kiqasan-ki' chawech.

⁶ Tabana' utzil taya' k'iy q'ij nuk'aslen, y ri nujuna' kan richin ta jantape'.

⁷ Xtinq'et ta k'a tzij chawech richin q'asen. Kan kinato' rik'in ri awutzil y man kinamalij kan.

⁸ Keri', kan xtinbixaj ri abi' richin jantape'. Kan xtinben k'a ri nusujun chawech ronojel q'ij.