Wuj Richin Bix Chire ri Dios 59 - Kaqchiquel Bible

Ri Jehová ja rija' ri qakolonel*f57*

¹ Nimalej nu-Dios yin, tabana' utzil kinajech'ej chikiwech ri e etzelanel wichin. Kinakolo' chikiwech ri yeyakatej chuwij.

² Kinajech'ej chikiwech ri nalex-pe ri etzelal kik'in. Kinakolo' chikiwech ri achi'a' ri e kamisanela'.

³ Roma jantape' kiq'eleben ri nuk'aslen. Ri nima'q taq achi'a' kimolon k'a ki' richin yinkiya' pa k'ayew. Nikiben ronojel re', stape' yin man jun numak nubanon.

⁴ Kan man jun ch'a'oj nubanon, jak'a rije' kan yebujuj chinukanoxik. Kinoqaqa k'a chi'ak'u'x, katanpe wik'in y tatz'eta'.

⁵ Rat Jehová Dios k'iytisanel richin ronojel, rat ri at qa-Dios roj israelita. Kayakatej k'a richin naya' ri rutojbalil-mak chike konojel ri man yatkitzeqelibej ta; Man tajoyowaj kiwech konojel ri nikipaba-ki' chawech.

⁶ Re winaqi' re', ri pa taq tiqaq'ij yepe y kan yeba'on achi'el tz'i', yebiyajilan chupan chijun ri tinamit, nikikanoj achoq ik'in nikiben oyowal.

⁷ Kan nikik'aqala' k'a poqon taq ch'abel, y ri kaq' kan achi'el espada. y kan nikibij-qa chi man jun ye'ak'axan chire ri yekibij.

⁸ Jak'a rat Jehová kan xkatze'en chikij re winaqi' re'; kan xke'awulaj k'a ri man yatkitzeqelibej ta.

⁹ Yin kan ninto-wi' awik'in rat nu-Dios, chuwech ri etzelanel wichin; roma kan ja rat k'a ri at nuto'onel.

¹⁰ Rat, ri najoyowaj nuwech, xkayuqen wichin; xtaya' k'a q'ij chuwe chi yin xkikikot chikij ri e etzelanel wichin.

¹¹ Man ke'akamisaj-el jumul, richin chi ri nuwinaq nikik'en kina'oj chikij rije'; xa ke'ataluj k'a el rik'in ri awuchuq'a' y tabana' chike richin nikitej poqon, keri' tabana' chike, rat ri at nutobal yin.

¹² Kere' tikik'uluwachij roma jantape' yemakun rik'in ri ch'abel ri ye'el pa kichi', Kan ta xtiqasex kiq'ij roma ri kinimirisanen, y roma xaxe ri tz'ukuj-tzij ri xqa' chikiwech.

¹³ Nimalej Dios, kan ke'ak'isa' k'a el rik'in ri awoyowal, ke'ak'isa' k'a el richin man yeq'alajin ta chik. Kan tetamex k'a chi rat naq'et-tzij pa qawi' roj ri oj rijatzul kan ri Jacob y pa ruwi' chijun ruwach'ulew.

¹⁴ Kepe k'a ri pa taq tiqaq'ij y kan keba'on achi'el tz'i'; kan kebiyajlan chupan chijun ri tinamit.

¹⁵ Kebiyajlan k'a chukanoxik ri k'o chi nikitej, y wi man jun nikil richin yech'uch'u' ta juba', kan tikiq'axaj k'a ri aq'a' rik'in jiloj.

¹⁶ Jak'a yin kan xtinbixaj ri awuchuq'a', kan ronojel nimaq'a' xtinnimirisaj ri abi' roma ri ajoyowanik pa nuwi'; roma kan awik'in rat ninto-wi-wi' chupan ri q'ij richin ruk'ayewal.

¹⁷ Nu-Dios yin, ja rat ri at wuchuq'a', roma ri' ninbixaj ri abi'. Kan ja rat k'a ri at nutobal y ri ajoyowanik pa nuwi' kan richin jantape'.