Wuj Richin Bix Chire ri Dios 58 - Kaqchiquel Bible

Ruk'utuxik ri rutojbalil mak pa kiwi' ri e banoy etzelal*f56*

¹ Rix nima'q taq achi'a', ¿kan qitzij kami chi rix niq'et-tzij pa ruchojmilal? ¿Kan qitzij kami chi kan choj ri ibanobal?

² Xa man keri' ta, xa kan pa taq iwánima nalex-pe ri etzelal. Xa kan ich'obon chik k'a achike chi etzelal ri xtibebana' pa qaruwach'ulew.

³ Rix ri ix banoy etzelal kan pan isanti'il k'a xich'er yan iwi'. Kan xaxe k'a toq xixalex, xich'er kan iwi' richin ri tz'ukuj-tzij.

⁴ Ri ich'abel rix achi'el ri kamisanel ya' ri nel pa ruchi' ri kumetz, kan achi'el ri kumetz ri nuben chi man nrak'axaj ta,

⁵ ri kan man nrak'axaj ta ri ruch'abel ri aj-itz, stape' kan jun aj-itz ri kan jebel nuben richin nuqasaj-ruq'ij ri kumetz.

⁶ Nu-Dios yin, tawulaj-el key ri e banoy etzelal, tawulaj-el key ri kan achi'el koj nikiben chuwij.

⁷ Kan ta k'a xtaben chike chi xkek'is-qa achi'el nuben ri ya' toq nibiyin-el. Toq nikik'eq ri kokoj taq ch'ab, kan ta k'a xtaq'ej chikiwech.

⁸ Kan ta k'a xkek'is rije' achi'el ri chikop ri nibix pur chire, ri eqal-eqal nik'is-qa. Man ta k'a xtikitz'et ri saqil, achi'el jun ak'ual ri kamineq xalex.

⁹ Ke'ak'uqu-el achi'el ri k'ix ri man jani k'o ruk'ixal, ke'ak'uqu-el rik'in ri awoyowal, achi'el xa ta juwi' k'ix ri nik'uq-el roma ri surkum.

¹⁰ Ri kan choj kik'aslen kan xkekikot k'a toq xtikitz'et re'. Kan xtimu'e' k'a ri kaqen chupan ri kikik'el ri aj-maki'.

¹¹ K'ari' xtikibij ri choj kik'aslen: Qitzij na wi kan k'o nuch'ek ri jun ri kan choj ruk'aslen; kan qitzij na wi chi k'o jun Dios ri niq'aton-tzij pa ruwi' ri ruwach'ulew, xkecha'.