Wuj Richin Bix Chire ri Dios 56 - Kaqchiquel Bible

Bix richin kuqubabel-k'u'x*f54*

¹ Nu-Dios, tabana' utzil tajoyowaj nuwech, roma kan ek'o winaqi' ri e tzeqelibeyon wichin. Kan chaq jantape' k'a in kitzeqeliben y yinkiya' pa k'ayew.

² Kan chijun k'a q'ij ri e etzelanel wichin nikiqasaj nuq'ij. Janila k'a e k'iy ri yebanon oyowal wik'in, rik'in nimirisanen.

³ Ri q'ij toq ri xibinri'il noqaqa pa nuwi', ninkuquba' nuk'u'x awik'in.

⁴ Nu-Dios yin, kan nukuquban nuk'u'x rik'in ri ach'abel. ¡Roma ri' kan man xtinxibij ta wi' chire ri achike xtikiben chuwe ri winaqi'!

⁵ Jantape' k'a yinkisokola' rik'in ch'abel; ri kich'obonik chuwij, xaxe k'a richin yinkiya' pa k'ayew.

⁶ Nikimol k'a ki' pan ewel; kitzuliben ri akuchi yiq'ax-wi yin, richin nikelesaj ri nuk'aslen.

⁷ Nu-Dios yin, tabana' utzil taya' rutojbalil-mak chike. Taqasaj k'a ruq'ij ri kitinamit rik'in ri awoyowal.

⁸ Rat awetaman janipe' mul in animajineq chuwech ri oyowal; re' kan atz'iban k'a chupan ri awuj. Ri ruya'al runaq'-nuwech kan ayakon k'a chupan jun jebelej k'ojelibel.

⁹ Ri e etzelanel wichin kan xketzolin k'a chikij, toq yin xkich'on awik'in. Jak'a yin kan wetaman, chi rat nu-Dios kan atk'o wik'in.

¹⁰ Nu-Dios yin, kan nukuquban nuk'u'x rik'in ri ach'abel, Nukuquban nuk'u'x rik'in ri abin chuwe.

¹¹ Yin kan nukuquban nuk'u'x awik'in rat, ¡Roma ri' kan man xtinxibij ta wi' chire ri achike xtikiben chuwe ri winaqi'!

¹² Roma ri' xtintaqej k'a ri nusujun chawe nu-Dios yin. Kan xtinya' k'a sipanik richin matioxinik chawe.

¹³ Roma xinakol chuwech ri kamik y xinajech'ej chuwech ri pikbel, richin chi yibiyin chuwa saqil chawech rat.