Wuj Richin Bix Chire ri Dios 55 - Kaqchiquel Bible

Jun ri tzeqeliben roma niban itzel chire*f53*

¹ Nu-Dios yin, tabana' utzil tawak'axaj ri nuch'owen. Man tawewaj-awi' chinuwech.

² Tabana' utzil kinawak'axaj y tak'uluba-pe ri nuch'abel, roma yin rik'in ronojel wánima yich'on awik'in, chupan ri tijoj-poqonal.

³ Ri wánima kan ruxibin-ri', roma ri kich'abel ri e etzelanel wichin. Kan in kiya'on pa ruk'ayewal ri itzel taq winaqi'. Kan in kinojisan k'a rik'in q'axo'n. Rik'in k'a janila koyowal in kitzeqeliben.

⁴ Kan janila k'a niq'axon ri wánima, yin ninna' chi ri kamik niqaqa yan pa nuwi'.

⁵ Kan janila k'a nuxibin-wi' y kan yik'ark'ot. Kan man jun chik yitikir ninben roma ri xibinri'il.

⁶ Roma ri' xinch'ob chi k'ate' ta k'o nuxik', achi'el ruxik' ri ti paloma, richin ta chi yibe nej y yinuxlan ta.

⁷ Kan ta keri', yin yinanimej ta el y nej ta yibe-wi. Y kan k'a pa tz'iran ruwach'ulew ta yibek'oje-wi.

⁸ Kan chi'anin ta k'a ninto-wi' chuwech ri nimalej kaq'iq'. Kan yinanimej ta k'a chuwech ri kaq'iq'-job.

⁹ Tabana' utzil ajaw, ke'awulaj ri e etzelanel wichin y tasacha' kik'u'x rik'in ri kich'abel, roma nutz'eton chi kan ruyon etzelal y kamik ri nibanatej chupan ri tinamit.

¹⁰ Ri etzelal kan chaq nisutiyaj k'a chirij ri tinamit chi paq'ij chi chaq'a'. Chupan ri tinamit kan xaxe k'a ri itzel taq banobel y ri itzel taq ch'obonik k'o.

¹¹ Ruyon k'a itzel taq banobel ri k'o chikikojol, ri pa taq nima'q ruwech bey richin molojri'il kan ruyon q'oloj y eleq' ri yebanatej.

¹² Xa ta ja ri etzelanel wichin ri xya'on nuk'ix, kan ta xinkoch'. O wi ja ta ri netzelan wichin, kan ta xinwewaj-wi' chuwech.

¹³ Jak'a xa man keri' ta, roma xa kan ja ri jun ri k'o más naqaj chuwe yin ri xyakatej chuwij, jun ri kan xubananej chi kan xok wachibil.

¹⁴ Ri kan junan k'a xqayala' chiqawech ri qakikoten y ri k'o chi xqaben. Kan junan k'a qawech xojbe chupan ri rachoch ri Dios.

¹⁵ Re winaqi' kere' kan chaq k'ate' ta k'a xtiqaqa ri kamik pa kiwi'. Kan k'a e k'es ta k'a xke'apon chupan ri jul richin muqbel, roma rije' xa kan xaxe k'a ri etzelal ri k'o chikikojol.

¹⁶ Jak'a yin kan rik'in k'a ri nu-Dios ri xkitzijon-wi. Y rija' kan xkirukol-wi.

¹⁷ Yin kan xkich'on k'a rik'in rija' ri tiqaq'ij, nimaq'a' o pa taq nik'aj-q'ij. Rija' kan xtrak'axaj k'a ri nuch'abel.

¹⁸ Rija' kan xtukol ri nuk'aslen, stape' chupan ri oyowal ri yakatajineq chuwij, y stape' kan janila e k'iy ri e yakatajineq chuwij,

¹⁹ Ri Dios ri ruq'aton-pe-tzij jantape', xkirak'axaj yin y xtuqasaj kiq'ij ri e etzelanel wichin. Roma rije' man nikijel ta ri rubeyal ri kik'aslen y maneq rukiy ri Dios chikiwech.

²⁰ Ri wachibil xa kan xyakatej k'a chuwij, stape' junan qawech rubanon-pe. Y xa kan man xutaqej ta k'a ri rujikibel-tzij ri rubanon wik'in.

²¹ Ri ruch'abel kan jebel k'a nuben chire, Jak'a ri ránima xa nojineq chi oyowal. Ri ruch'abel kan e ch'uch'uj, más chuwech ri aceite ri niya'ox chirij jun sokotajik. Jak'a ri ch'abel ri' xa e achi'el jun espada ri nikamisan.

²² Taya' pa ruq'a' ri Jehová ronojel ri ruk'ayewal ri k'aslen, y rija' xtuben chawe chi kow xkak'oje'; roma rija' man xtuya' ta q'ij chi ri choj ruk'aslen xtitzaq jumul.

²³ Nu-Dios yin, rat xtaben chi ri winaqi' ri nikiben itzel taq banobel xkeken chi'anin. Xtaben k'a chi ri winaqi' ri kan xaxe ri kamik nikajo' nikiben y e q'olonel, man xkek'ase' ta k'a k'iy juna'. Jak'a yin kan awik'in rat ninkuquba' nuk'u'x jantape'.