Wuj Richin Bix Chire ri Dios 50 - Kaqchiquel Bible

Ri qitzij rubanik richin niqaya' ruq'ij ri Dios*f48*

¹ Ri Jehová ri k'o ruq'ij chikiwech ch'aqa' chik dios nich'on, yeroyoj k'a konojel winaqi' richin chijun ruwach'ulew, nitiker-pe pa relebel-q'ij y napon k'a pa qajbel-q'ij.

² Ri Dios, rik'in ri rusaqil nuk'ut chi rija' kan k'o chiri' pa tinamit Sión, chupan ri tinamit ri kan jebel nitzu'un.

³ Ri qa-Dios nipe k'a rik'in nimalej rutzijol. Chuwech rija' peteneq jun q'aq' ri kan nuk'is ronojel. Y pa runik'ajal jun nimalej kaq'iq', chiri' peteneq-wi rija',

⁴ Rija' xkeroyoj k'a ri kaj y ri ruwach'ulew, xkeroyoj richin tikitz'eta' toq xtuq'et-tzij pa ruwi' ri rutinamit.

⁵ Ri Dios xtuteq rubixik chi tikimolo-ki' ri winaqi' ri e ruch'aron rija', ri xkiben jikibel-tzij rik'in rija' toq xkisuj kamelabel.

⁶ K'ari' ri kaj xtuq'alajirisaj k'a ri ruchojmilal richin rija', roma kan ja ri Dios ri qitzij q'atoy-tzij.

⁷ Rija' nubij chiqe: Tiwak'axaj k'a nuwinaq yin, roma kan xkibech'on iwik'in. Tiwak'axaj k'a israelita, roma xtinbenq'alajirisaj ri ibanobal. Ja yin ri in Dios, ri i-Dios rix.

⁸ Man yixinch'olij ta roma ri isipanik, ni man roma ta ri chikopi' ri ye'iporoj jumul, ri jantape' ek'o chinuwech yin.

⁹ Man nink'utuj ta k'a chiwe ri achija' taq wákix, ni ta ri taq tzuntzun ri ek'o iwik'in,

¹⁰ roma xa kan ja yin ri in rajaw konojel ri chikopi' ri ek'o pa k'echelaj; keri' chuqa' konojel ri jalajoj kiwech taq chikopi' ri ek'o pa taq q'ayis.

¹¹ Kan wetaman k'a kiwech konojel ri aj-xik' taq chikopi' ri e richin pa juyu'. Konojel k'a ri yebiyaj chuwech ri ruwach'ulew kan e wichin yin.

¹² Wi ta yin yinum, man ta ninbij chawe rat, roma kan wichin yin ri ruwach'ulew y ronojel ri k'o chuwech.

¹³ Yin kan man nintej ta rutijul ri bóyix, ni man ninqum ta kikik'el ri tzuntzun.

¹⁴ Ri abix richin matioxinik, jari' ta ri sipanik chire ri Dios. Kan tabana' k'a ronojel ri asujun chire ri nimalej Dios.

¹⁵ Y kan kinawoyoj k'a chupan ri q'ij richin tijoj-poqonal. Y yin kan xkatinkol y rat kan xtaya' nuq'ij.

¹⁶ Jak'a chike ri e banoy etzelal, kere' k'a ninbij: Rix man ruk'amon ta chi ninatala' ri nupixa', ni man ruk'amon ta ninataj ri nujikibel-tzij.

¹⁷ Rat xa nawetzelaj ri ruchojmilal ri ninya' yin. Xa naben chire ri nuch'abel chi kan man jun rejqalen.

¹⁸ Wi natz'et jun eleq'om, kan chi'anin nawachibilaj-el. Kan junan k'a awech naben-el kik'in ri nikiben ixoqinik.

¹⁹ Kan ruyon k'a itzel taq ch'abel ri nabila', y kan xaxe q'oloj ri nabanala'.

²⁰ Ach'obon k'a richin yach'on itzel chirij ri awach'alal. Natz'uk tzij chirij ri xa junan ate' rik'in.

²¹ Ja ronojel re' ri abanobal y yin kan man jun nubin. Roma ri', rat kan ach'obon k'a chi yin in junan awik'in rat. Wakami k'a xkatinch'olij, y xtinq'alajirisaj chawe ronojel ri abanobal.

²² Chi'iwonojel ri imestan kan ri Dios, tiq'ax k'a chiwech wakami; man xa xkixink'ajij y kan man jun k'a xkixkolon pa nuq'a'.

²³ Ri sipanik ri niqa' chinuwech, ja ri matioxinik ri nipe pan iwánima. Y wi rix choj xkixbiyin chinuwech yin, kan xkixinkol k'a.