Wuj Richin Bix Chire ri Dios 49 - Kaqchiquel Bible

Ri beyomel man ja ta ri' ri niya'on k'aslen*f47*

¹ Tiwak'axaj k'a chi'iwonojel rix tinamit, kan tiya' ixikin chi'iwonojel rix winaqi', richin chijun ruwach'ulew;

² keri' ri k'o kiq'ij y ri maneq ok kiq'ij, ri janila kibeyomel, y ri man jun ok k'o kik'in.

³ Kan xkibech'on k'a rik'in na'oj. Kan xtinbenq'alajirisaj k'a ri nojibel ri nel-pe pa wánima.

⁴ Kan xtintej nuq'ij ninkusaj ch'abel ri niq'ax chikiwech konojel. Xtinbixaj k'a re etamabel tzij re', rokik ninq'ojomaj ri arpa.

⁵ Yin man xtinxibij ta wi' toq xtipe ri q'ij richin ruk'ayewal, toq ri e banoy taq etzelal xtikisutij chik wij.

⁶ Ri kikuquban kik'u'x rik'in ri kibeyomel, y ri kan nikinimirisaj-ki' rik'in ronojel ri k'o kik'in,

⁷ man jun chike rije' ri nitikir ta nukol ri rach'alal, ni man nitikir ta nutoj chire ri Dios ri rukolotajik.

⁸ Roma ri rajel ri ruk'aslen kan janila k'a nim. Kan man jun bey k'a xtitojtej,

⁹ richin chi nik'ase' ta richin q'asen, y man jun bey napon ri ruch'akul chupan ri muqbel kamineq.

¹⁰ Kan xtiq'alajin jebel chi konojel winaqi' yeken, keri' ri wineq aj-na'oj y man aj na'oj ta. Y ri beyomel ri k'o kik'in, xa xtik'oje' kan chike ch'aqa' chik.

¹¹ Stape' xkiya' ri kibi' rije' chire ri kulew y ri kachoch kichin ri kijatzul, kan jak'a ri muqbel kamineq, jari' ri kachoch richin q'asen. Chiri' k'a xkek'oje-wi jantape'.

¹² Ri wineq man richin ta q'asen ri ruk'aslen, stape' janila beyom. Xa kan junan k'a kik'in ri chikopi' ri yeken-el.

¹³ Keri' xkek'is ri winaqi' ri xa kikuquban kik'u'x kik'in-qa rije'. Chuqa' keri' xkek'is ri winaqi' ri kikuquban kik'u'x rik'in ri kibeyomel.

¹⁴ Rije' kan xtiban k'a chike achi'el ri karne'l ri ye'uk'uex-el pa kamik, ja ri kamik ri xtiyuqen kichin achi'el nuben jun yuq'unel, y ri choj kik'aslen kan xkebek'oje' pa kiwi' rije'. Ri jebelej kibanik kan eqal k'a nibek'is chupan ri jul muqbel kamineq.

¹⁵ Jak'a ri nuk'aslen yin kan xtukol ri Dios chuwech ri jul ri', roma rija' xkiruk'uaj-el k'a akuchi k'o-wi.

¹⁶ Man itzel tana' toq jun nibeyomer-q'anej, toq ri rachoch kan jebel nitzu'un roma ri rubeyomel,

¹⁷ roma re beyom re', toq xtiken-el, kan man jun k'a xtuk'uaj. Ri janila chi beyomel ri k'o rik'in man xtuk'uaj ta el chupan ri jul.

¹⁸ Stape' toq k'a k'es na, kan janila nuya-qa ruq'ij, y kan janila chuqa' niya'ox ruq'ij koma ri winaqi',

¹⁹ stape' keri', rija' xtiken y xtapon kik'in ri sol winaqi' kichin ri rute-rutata'. Xa man jun bey chik k'a xtutz'et ri saqil.

²⁰ Ri wineq beyom, niya'ox ruq'ij y xa man nuya' ta rejqalen ri Dios, xa kan junan k'a kik'in ri chikopi' ri yeken-el.