Wuj Richin Bix Chire ri Dios 47 - Kaqchiquel Bible

Ri Dios jari' ri rey richin chijun ruwach'ulew*f45*

¹ Chinimalej iwonojel rix winaqi', tipaq'apa' ri iq'a'. Tiya' k'a ruq'ij ri Dios rik'in kikoten.

² Roma ri Jehová kan k'o rukiy. Ja rija' ri nimalej rey pa ruwi' chijun ri ruwach'ulew.

³ Kan yerujech k'a ri tinamit pa qaq'a', y nuben k'a chiqe chi yojk'oje' pa kiwi' ri ch'aqa' chik ruwach'ulew.

⁴ Rija' kan nucha' k'a ri k'o chi niqichinaj kan roj. Kan ja ri ruwach'ulew ri xuya' chire ri Jacob, roma janila xrajo'.

⁵ Kan rik'in k'a raqoj-chi'ij richin kikoten, nijote-q'anej ri Jehová chupan ri rajawaren. Ri Jehová kan niya'ox ruq'ij rik'in trompeta.

⁶ Kixbixan, tiya' ruq'ij ri qa-Dios. Kixbixan, tiya' ruq'ij roma ja rija' ri qa-rey.

⁷ Roma kan ja rija' ri rey richin chijun ruwach'ulew. Kan jebel k'a kixbixan richin niya' ruq'ij rija'.

⁸ Ri Dios kan tz'uyul chupan ri tz'uyubel richin q'atoj-tzij, kan nuq'et k'a tzij pa ruwi' ri ruwach'ulew.

^9-10 Ri aj-raqen kichin ri ruwach'ulew kan nikimol k'a ki', kan achi'el nikimol-ki' ri rutinamit ri ru-Dios ri Abraham, roma kan pa ruq'a' ri Dios ek'o-wi konojel ri q'atoy taq tzij. Rija' kan k'o k'a pa ruwi' ronojel.