Wuj Richin Bix Chire ri Dios 44 - Kaqchiquel Bible

Ch'owen rik'in ri Dios pa ruwi' ri tinamit Israel*f42*

¹ Nimalej Dios, kan rik'in k'a qaxikin qak'axan ri utzilej rutzijol. Ri qate-qatata' xetzijon kan chiqe chi rat xaben ri meyel taq banobel ri ojer kan.

² Rik'in ri aq'a' xe'awelasaj ri winaqi' chuwech ri kiruwach'ulew y xe'ajikiba' ri qati't-qamama' chuwech ri ruwach'ulew ri'; xaya' k'a ruk'ayewal pa kiwi' ri winaqi' ri', jak'a ri qati't-qamama' xaben chi xek'iyer-q'anej ri kijatzul.

³ Rije', man roma ta ri kikamisabal xe'ok kan chuwech ri ruwach'ulew ri', ni man ja ta ri kuchuq'a' rije' ri xekolo. Kan ja ri awijkiq'a' y ri asaqil rat kik'in rije' ri xbanon chike chi xech'akon, Kere' xaben kik'in roma kan xeqa' chawech.

⁴ Rat, nimalej Dios, ri at nu-rey. Tabana' utzil taya' ri kolotajik chike ri e rijatzul kan ri Jacob.

⁵ Rik'in k'a ri ato'onik rat xkeqatzeq ri e etzelanel qichin. Pan abi' k'a rat xqojch'akon chikij ri e yakatajineq chiqij.

⁶ Yin man ninkuquba' ta nuk'u'x rik'in ri rute-ch'ab, ni man ja ta ri espada ri xtikolon wichin.

⁷ Roma kan ja rat ri xabanon chiqe chi xojch'akon chikij ri e etzelanel qichin, y xe'ak'ixbisaj ri e yakatajineq chiqij.

⁸ Awik'in k'a rat qa-Dios roj, xqojkikot-wi ronojel q'ij. Kan jantape' k'a xtiqanimirisaj ri abi'.

⁹ Jak'a re wakami xa xojamalij kan y xojak'ixbisaj; y man at beneq ta chik kik'in ri aj-labal.

¹⁰ Xaben chiqe chi xqatzolij-qi' chiqij chikiwech ri e etzelanel qichin. Xaya' q'ij chi rije' xkik'uaj-el ronojel ri k'o qik'in.

¹¹ Xojajech k'a achi'el toq nuk'uex jun karne'l richin nibekamisex. Xa xojataluj k'a el chikikojol winaqi' ri man yatkitzeqelibej ta rat.

¹² Xojak'ayij-el y xa man jun qajel xak'utuj, kan man jun k'a xach'ek kan richin xojajech-el.

¹³ Xaya' k'a q'ij chi xojkik'ixbisaj ri ek'o chiqanaqaj. Kan yojkiyoq' y yetze'en chiqij ri tinamit ri kisutin-qij.

¹⁴ Ri winaqi' kan chaq yojkinatala' k'a richin yetze'en chiqij. Konojel ri yojkitz'et, kan nikisilola' ri kijolon chiqij.

¹⁵ Roma ri' ronojel q'ij kan nisach k'a nuk'u'x. Kan man yitikir ta ninyek-q'anej ri nujolon.

¹⁶ Koma ri winaqi' ri yeya'on nuk'ix y nikiqasaj nuq'ij; koma ri e etzelanel wichin ri nikajo' yinkiya' pa k'ayew.

¹⁷ Ronojel re' xpe pa qawi', jak'a kan man at qamestan ta kan, ni man qaq'ajon ta ruwi' ri ajikibel-tzij ri abanon qik'in.

¹⁸ Kan man qabanon ta richin yatqamalij kan, ni man qach'aron ta kan qi' chire ri bey ri xak'ut chiqawech.

¹⁹ Man rik'in ri', rat xojaq'ututej; xojaya' akuchi yek'oje-wi ri k'uxunela' taq chikopi'. Y ri kamik kan niqaqa yan k'a pa qawi'.

²⁰ Wi ta roj xatqamestaj ta kan rat, qa-Dios, o xa xqaya' ta ruq'ij jun chik dios.

²¹ ¿Kan man ta kami nanabej rat? roma rat kan awetaman k'a ronojel ri k'o pa qánima.

²² Roj kan awoma k'a rat ajaw, jubama yojkamisex, xa kan banon chiqe chi oj achi'el ri karne'l toq ye'uk'uex richin yebekamisex.

²³ Kak'astej, qa-Dios roj, ¿achike roma yawer? Kayakatej k'a, man yojamalij kan richin jantape'.

²⁴ ¿Achike roma nawewaj-awi' chiqawech, y amestan ri qaq'axo'n y ri ruk'ayewal ri niqaq'axaj roj?

²⁵ Roma ri qánima kan ruqasan-ri' jumul. Chijun ri qach'akul kan k'a pan ulew qajineq-wi.

²⁶ Roma ri' Jehová, kayakatej richin yojato'. Qojakolo' rik'in ri ajoyowanik.